Avaría no único tren madrugador do Eixo Atlántico: retraso de case unha hora na saída Vigo-A Coruña

Unha "incidencia técnica puntual" provocou un atraso de case unha hora na saída dun tren de media distancia que cubría o traxecto Vigo-A Coruña á primeira hora da mañá deste mércores, causando tamén atraso no traxecto inverso. Segundo informaron fontes de Renfe, a incidencia rexistrada provocou que o tren que tiña que saír da estación de Vigo-Urzáiz ás 6.40 horas da mañá fixéseo 57 minutos máis tarde.

Así mesmo, e como consecuencia do anterior (xa que se trata do mesmo convoi) a saída do tren da Coruña en dirección a Vigo prevista para as 9.00 horas realizouse cun atraso de 24 minutos, detallaron as mesmas fontes. Algúns usuarios denunciaron a través de redes sociais a falta de alternativas de transporte. No caso de Vigo, lamentaron que decenas de persoas tiveron que esperar á saída por unha avaría no "único tren madrugador" do Eixo Atlántico.