O alcalde de Ferrol recibe aos bombeiros que foron a Libia en procura de persoas tras o desastre do ciclón 'Daniel'

O alcalde de Ferrol, José Manuel Rey Varela, recibiu no mediodía deste xoves á expedición de bombeiros que se desprazaron a semana pasada a Libia para colaborar nas tarefas de rescate e procura de desaparecidos a consecuencia do ciclón 'Daniel', que alagou boa parte do país norteafricano.

Trátase dun grupo de bombeiros desprazado que formou parte do operativo da ONG Briegal e no que participaron catro profesionais do parque municipal de Ferrol: Manuel Tato, Roberto Pulzoni, José Painceiras e Diego Rico; un bombeiro de Navantia, Miguel Martínez; e un bombeiro de Aena, Javier González. O grupo que viaxou a Libia complétase con outro bombeiro de AENA e o rexedor tamén tivo ocasión de saudar aos tres guías de Casaga (Cans de Salvamento de Galicia), Alejandro Barreiro, Luís Miguel Vila e José Luís García.

Rey Varela aproveitou este acto para felicitar ao grupo polo traballo realizado e polo "seu espírito solidario e de cooperación", mostrado desde o momento no que tomaron a decisión de partir cara a Libia para contribuír cos labores de procura de persoas. No transcurso da recepción, Rey Varela coñeceu os procedementos realizados por estes profesionais, nos que estiveron coordinados cos cans Thor e Anka, de Casaga. Así, o alcalde mostroulles o orgullo que supón que "Ferrol conte con profesionais tan comprometidos ao servizo da cidadanía e daqueles territorios que máis o precisan".

O alcalde de Ferrol, José Manuel Rey Varela, recibe aos bombeiros que foron a Libia recentemente en procura de persoas | Fonte: CONCELLO DE FERROL