O Sergas, "aberto a escoitar" ao colectivo de enfermeiras que protestou o martes en cinco hospitais galegos

O conselleiro de Sanidade, Julio García Comesaña, afirmou que o seu departamento está "aberto a escoitar" ás colectivo Enfermeiras APT, que na xornada do martes protestou fronte a cinco hospitais galegos para pedir melloras nas súas condicións laborais.

Iso si, García Comesaña destacou os "esforzos" da Administración por alcanzar acordos na mesa sectorial, o principal órgano negociador cos sindicatos con maior representatividade. Neste sentido, lembrou o pacto alcanzado en abril por unanimidade con melloras retributivas e de condicións (como a redución paulatina do horario ata alcanzar a xornada de 35 horas semanais en 2025) para todo o persoal.

Así se pronunciou o conselleiro este mércores, en declaracións aos medios tras o acto de presentación en Santiago da estratexia galega de oncoloxía de precisión, despois das protestas de Enfermeiras APT vividas na Coruña, Santiago, Lugo, Monforte e Pontevedra. Segundo afirmaba unha portavoz do colectivo, non descartan ir á folga "se en San Lázaro (sede da Consellería de Sanidade) non sentan a negociar unha mellora das condicións de traballo". E é que os sindicatos da mesa sectorial, dixo, "asinan cousas polas que nós non queremos pasar".

A este respecto, o conselleiro reivindicou este mércores que o acordo do 20 de abril foi "probablemente o maior avance" en cuestións laborais que asinaron a Administración autonómica e os sindicatos nos "últimos 15 anos". Por iso, rexeitou pór "en dúbida" o esforzo e o "compromiso" da Xunta coas condicións laborais, á vez que enxalzou o labor da mesa sectorial, que precisamente a semana pasada arrincaba un novo 'mandato' tras as eleccións sindicais do mes de maio.

Concentración convocada polo colectivo Enfermeiras APT fronte ao CHUS | Fonte: Europa Press - Arquivo