O alcalde de Pontevedra responsabiliza á Xunta dos problemas no viario perimetral do Hospital Montecelo
Miguel Anxo Fernández Lores insistiu en que o concello "non decidiu onde se pon a localización do Gran Montecelo", nin tampouco onde van os aparcadoiros ou o contido do proxecto sectorial de infraestruturas.
Por E.P. | SANTIAGO DE COMPOSTELA | 13/10/2023 | Actualizada ás 17:41
O alcalde de Pontevedra, Miguel Anxo Fernández Lores, responsabilizou á Xunta dos problemas de acceso a propiedades privadas xerados polo viario perimetral do Hospital Montecelo. Nunha rolda de prensa celebrada este venres, o alcalde asegurou que a Administración autonómica é a culpable de que haxa leiras que quedaron sen acceso por negarse a ampliar as expropiacións antes de que se contratasen as obras.
Segundo manifestou Lores, o concello "está a dar todas as facilidades do mundo para a construción do novo hospital de Montecelo". "Temos un convenio asinado no seu día, que, por certo, non aparece indicado en ningún sitio dos carteis que alí están", engadiu.
O rexedor da capital provincial insistiu en que o concello "non decidiu onde se pon a localización do Gran Montecelo", nin tampouco onde van os aparcadoiros ou o contido do proxecto sectorial de infraestruturas. Lores sinalou que "o motivo das queixas veciñais" é o proxecto feito pola Xunta, que foi sometido a exposición pública e "é o título habilitante para as expropiacións" feitas tamén polo Goberno galego.
Tamén defendeu que a administración que encabeza "desde o primeiro minuto" comentou que a expropiación prevista "era insuficiente para garantir o acceso ás leiras". "Nós pasamos no seu día documentación que recomendaba facer unha exposición máis ampla da feita", engadiu.
"Fixémoslles notar que era imposible facer un viario de servizo ao carón do viario de circulación e negáronse, de maneira reiterada, a modificar esas expropiacións", recalcou o alcalde de Pontevedra. Lores considera que foi agora cando a Xunta se deu conta de que "meteu a pata" ao non facerlle caso ao concello, algo que o líder local do Partido Popular, Rafa Domínguez, "sabe perfectamente" e, por iso, agora "segue xogando a despistar e segue botándolle a culpa ao concello".
TRIBUNAL DE CONTAS
Nesta mesma comparecencia, o alcalde de Pontevedra, Miguel Anxo Fernández Lores, informou "dunha nova metedura de pata" do portavoz do grupo municipal do Partido Popular en Pontevedra, Rafa Domínguez, despois de que o Tribunal de Contas resolvese que "non existe ningunha responsabilidade contable" no referido ao contrato de construción e explotación dunha planta de compostaxe na Canicouva.
A Fiscalía xa dixera que o contrato do aluguer dos terreos realizado entre o concello e a Comunidade de Montes da Canicouva estaba en vigor, pero a petición do Partido Popular o asunto foi remitido ao Tribunal de Contas. "Domínguez quixo enmarañar ata o último extremo esta cuestión e a conclusión é que volve fracasar no intento de ensombrecer cuestións municipais", sentenciou o alcalde.
