A tromba de agua deixa alagamentos en rúas de Santiago con coches atrapados e comercios en perigo

O desfile de borrascas atlánticas que atravesa a península, coa chegada de 'Aline', deixou na tarde deste mércores fortes choivas a partir das 17.30 horas, momento no que a Central de Atención ás Emerxencias 112 empezou a rexistrar un incremento de incidencias que teñen a súa orixe no temporal. No caso da capital galega, preto das 19.00 horas produciuse unha gran tromba de auga, precipitacións de "alta intensidade" que en apenas uns minutos supuxeron a caída de entre 25 e 30 litros por metro cadrado, o que impactou nas rúas deixando alagamentos.

O 112, pendente de facer balance xeral, notou o incremento de incidencias a partir das 17.30 horas, pero constatou que foron incidencias "sen consideración" (ás 20.00 horas) e que se trata de rúas alagadas e algún baixo alagado. Fontes consultadas por Europa Press explicaron que unha muller tivo que ser axudada polos Bombeiros de Santiago a saír do coche na rotonda do Restollal, ao quedar atrapada pola auga; mentres que os efectivos deste corpo tamén acudiron á zona de Fontiñas por coches afectados pola inundación, pero os seus ocupantes estaban fóra dos vehículos.

Segundo o parte actualizado do 112, as últimas horas deixaron un incremento das incidencias relacionadas co vento e coa choiva. En total, desde as 12 deste mediodía ata as 20 horas contabilizáronse 160 incidentes. Galicia sufriu os efectos dun episodio meteorolóxico adverso de nivel laranxa que afecta o litoral da provincia da Coruña. Ao mesmo tempo, tanto no resto da costa como en boa parte do interior da comunidade permanece activo un aviso amarelo por choiva e vento.

Ao longo da tarde, as incidencias rexistradas tiveron que ver, especialmente, coa presenza de obstáculos nas estradas (postes de luz ou telefonía, carteis e pancartas), con 56; as inundacións en inmobles, rúas, estradas e bolsas de auga (47), e as árbores caídas nas vías de circulación (42).

A provincia máis afectada foi a da Coruña, con 99 incidencias; seguida de Pontevedra, con 43; Lugo, con 17; e Ourense, cunha. Santiago de Compostela foi o concello máis castigado e contabilizou 15 incidentes; mentres que Ribeira e A Coruña, sumaron 4. Na provincia da Pontevedra, Vigo rexistrou 9 incidencias deste tipo, seguido da Estrada con 4. En Lugo, Ribadeo e Friol contaron tres. Pola súa banda, na provincia de Ourense a única incidencia estivo localizada no concello de Ramirás e estivo vinculada cunha árbore caída.

UN PAVILLÓN E UN LOCAL COMERCIAL ASOLAGADOS, SEN DANOS PERSOAIS

O 112 sinala que as incidencias rexistradas non causaron danos persoais, aínda que destacou a chamada dun particular desde Teo, para avisar de que no pavillón de Calo había 30 menores e estábase alagando. Para este operativo, foron mobilizados os axentes da Policía Local e os membros do Servizo Municipal de Emerxencias de Teo.

Tamén pola choiva, un particular informou ao 112 Galicia pasadas as 18.40 horas de que se alagou un establecemento comercial da avenida de Finisterre (Coristanco) por mor da obstrución dos sumidoiros na rúa. Neste operativo participaron a Policía Local e os voluntarios de Protección Civil de Coristanco.

CHOIVAS

No caso das precipitacións, segundo a información facilitada, nuns minutos rexistráronse na capital galega entre 25 e 30 litros de auga por metro cadrado, o que provocou asolagamentos. Pola súa banda, segundo se pode consultar na web de Meteogalicia, a estación que rexistrou maior cantidade de auga acumulada nesta xornada é a de Castrove, en Poio, con 65,5 litros por metro cadrado, seguida da de Salceda de Caselas (56 l/m2). Os ventos volveron soprar en Galicia con forza e rexistrouse un refacho máximo de 142,8 km/h en Muras, ás 19.50 horas, concretamente, na Serra do Xistral.

ÚLTIMAS HORAS

Esta noite de xoves o temporal elevou a unhas 271 as inundacións e outras incidencias rexistradas polo 112 Galicia dende o mediodía da pasada xornada e as 6.00 horas deste xoves. Segundo informou, a maioría delas tiveron lugar durante a tarde do mércores, mentres que esta madrugada sumáronse unicamente nove incidentes, ningunha de consideración.

As incidencias relacionadas coas vías de circulación foron as máis repetidas, coa caída de árbores e ramas (86), as inundacións e as bolsas de auga (38), a terra, as pedras ou as verteduras (9) como destacadas. A continuación, sitúanse as actuacións dos servizos de emerxencias para evitar riscos maiores (35) e as inundacións en rúas (32), vivendas (12), garaxes (9) ou baixos comerciais (8).

En canto ás provincias, a da Coruña continuou sendo a máis afectada con 130 incidencias, seguida de preto por Pontevedra (107). Pola súa banda, Lugo (26) e Ourense (8) sufriron con menor intensidade os efectos da meteoroloxía adversa. O maior número de incidentes rexistrouse en concellos como Santiago (22) e A Coruña (6), na provincia da Coruña; Pontevedra e Tui (8), así como A Estrada (5), na de Pontevedra; Ribadeo e Friol na de Lugo, con tres cada un e, por último, os municipios de Avión e O Barco de Valdeorras sumaron tres na provincia de Ourense.

INUNDACIÓNS E AFECTACIÓN DA ILUMINACIÓN, PERO SEN DANOS PERSOAIS

O 112 destaca que ningunha das incidencias rexistradas durante a pasada tarde e ao longo desta madrugada causou danos persoais. Con todo, si que se viu afectada a iluminación pública de cidades como Pontevedra, Santiago, Vigo ou Ferrol.

Na capital galega, ademais, as fortes choivas provocaron importantes inundacións en distintas zonas da cidade, con alagamentos en negocios do centro histórico e tamén do Ensanche. Ademais, alagáronse varias rotondas e os bombeiros tiveron que axudar a persoas que quedaron atrapadas nos seus vehículos debido ás balsas de auga (como unha muller e o seu bebé).

Así mesmo, houbo desprendementos de terra, un deles provocou a caída dun muro na contorna do Seminario Menor, no Camiño da Ameixaga próximo ao emparrado do parque de Belvís. Na Coruña tamén se rexistraron bolsas de auga na Avenida do Exército, a rotonda de Sabón e algúns tramos de Alfonso Molina, entre outras zonas.

O CONCELLO DE SANTIAGO MANTÉN O DISPOSITIVO DE ACTUACIÓN

Ante esta situación, o Concello de Santiago decidiu manter o dispositivo para actuar ante posibles danos. O consistorio lembra que, a pesar de que na xornada anterior estaba decretada a alerta amarela, este mércores non tiña esta previsión meteorolóxica. Os equipos dos bombeiros, policía local e do servizo de augas estiveron a traballar para "aliviar as canalizacións e abrir os sumidoiros", co obxectivo de facilitar a circulación e drenaxe da auga de choiva depositada.

Entre as zonas afectadas, o Consistorio sinala a rotonda de Fontes do Sar, a Praza Roxa, o camiño de Ameixaga (onde houbo desprendementos de terra), alagamentos en establecementos comerciais como nun supermercado en Frei Rosendo Salvado e nunha froitería de Santiago de Chile, así como en espazos que están cualificados como inundables nas marxes dos ríos.

Ademais, houbo varios avisos de persoas atrapadas en coches que puideron saír polo seu propio pé en canto parou de chover e diminuíu o caudal da auga. Tamén unha muller solicitou axuda para saír do seu coche na rotonda de Restollal, onde acudiron os bombeiros. Tanto a alcaldesa, Goretti Sanmartín, como o concelleiro de Obras, Xesús Domínguez, e o de Seguridade, Xan Duro, desprazáronse a estas localizacións afectadas, segundo informou o Concello, para seguir de preto os labores de control destinados a aliviar os danos.

O Concello quixo trasladar o apoio ás persoas afectadas e, en previsión de novos alagamentos, "manterá activo o dispositivo para contribuír a evitar que se produzan danos como consecuencia deste modelo de choiva intensa que cae en poucos minutos", o que provoca estas inundacións ao non ser capaz de drenar o chan estas cantidades de precipitacións.

Pola súa banda, o portavoz do grupo municipal do PP, Borja Verea, atribuíu o ocorrido á situación da rede de sumidoiros e tachou de "ineptitude" e case "neglixencia" a actuación do Concello de Santiago. "Como pode ser que a mediados de outubro teñamos os sumidoiros atrancados?", preguntouse para cualificar de "ineptitude, imprudencia, falta de dilixencia que roza a neglixencia". "E aí están os efectos", apostilou. Verea indicou que tamén se desprazou a zonas afectadas, como Belvís, e que puido falar coa muller atrapada no vehículo xunto a un bebé de seis meses, cuxo relato "é tremendo".