A USC promove un programa Erasmus en Angola e Cabo Verde a favor do turismo sustentable
A Universidade de Santiago destacou que o obxectivo deste proxecto internacional é favorecer a implantación de prácticas turísticas responsables e sustentables.
Por E.P. | SANTIAGO DE COMPOSTELA | 23/10/2023 | Actualizada ás 18:18
A Universidade de Santiago de Compostela (USC) destacou que impulsa o desenvolvemento do turismo responsable e sustentable en Angola e Cabo Verde a través do proxecto SUST-Turismo, unha iniciativa promovida no marco do programa Erasmus-EDU-2022-CBHE.
No programa, do que informou a USC nun comunicado, tamén participan outras institucións europeas como o Instituto Politécnico de Viana do Castelo ou ESCP Business School, ademais da Universidade Niamibe e os institutos superiores politécnicos Lusíada de Benguela e Lusíada Huambo, tamén de Angola. Ademais, do Instituto Superior de Ciencias Económicas e Empresariais e a Universidade Jean Piaget de Cabo Verde, o escenario no que acaba de botar a andar este programa.
A USC destacou que o obxectivo deste proxecto internacional pasa por fortalecer as relacións entre as universidades e centros de formación superior de Angola e Cabo Verde cos tecidos sociais e económicos destes dous países, co fin de favorecer a implantación de prácticas turísticas responsables e sustentables.
O programa SUST-Turismo ten unha duración de dous anos e terminará na primavera de 2025 en Angola, ata onde se desprazarán todos os socios promotores para participar na sesión de clausura e de valoración dos resultados.
