Voos desviados ou cancelados e liñas ferroviarias cortadas tras o paso de Ciarán

A borrasca 'Ciarán' que afecta o noroeste peninsular desde o mércores mantén interrompida a circulación ferroviaria en gran parte de Galicia, onde tamén se produciron cancelacións e desvíos de voos no tres aeroportos galegos.

Só o eixo atlántico e a conexión entre Santiago e Ourense que, á súa vez, enlaza co AVE a Madrid escapa das restricións ao tráfico ferroviario acordadas desde Renfe a raíz do temporal.

Así, permanece interrompida a circulación entre Ourense e Vigo, entre A Coruña e Ferrol e entre a cidade herculina e Monforte. En todas estas, o operador ferroviario habilitou un servizo de transporte alternativo por estrada. Ademais, a borrasca tamén obrigou a cortar os servizos de proximidade e Media Distancia de Ancho Métrico entre Ferrol e Oviedo.

VOOS

Nos aeroportos, a entrada de 'Ciarán' motivou o desvío de sete voos e a cancelación doutro en Santiago. A imposibilidade de tomar terra en Rosalía de Castro-Lavacolla destes avións motivou a suspensión dos catro voos á primeira hora deste xoves e atrasos no despegamento doutros tres.

En Vigo e A Coruña foron cancelados dous voos, ambos os procedentes de Madrid, que tiñan previsto aterrar na tarde do mércores nas terminais de Peinador e Alvedro. Fontes de Aena consultadas por Europa Press trasladaron que a situación meteorolóxica nos aeroportos galegos mellorou na mañá do xoves, na que unicamente se produciu un desvío desde A Coruña e Santiago.

MANIFESTACIÓN

Por outra banda, CCOO de Galicia suspendeu as concentracións convocadas para este xoves pola paz e en apoio ao pobo palestino, que ían ter lugar pola tarde na Coruña e Vigo.

Segundo informa, o sindicato toma a decisión polas malas condicións climatolóxicas, "que non só dificultarían a participación nas mobilizacións senón que poderían pór en risco os desprazamentos de persoas chegadas doutras localidades de todo o país".