As obras para conectar a AP-9 coa A-54, en Santiago, provocarán desvíos de tráfico os vindeiros luns e martes

O Ministerio de Transportes, Mobilidade e Axenda Urbana (Mitma) executa as obras para conectar a autoestrada AP-9 e a autovía A-54 (ligazón Orbital), en Santiago de Compostela, o que suporá unha serie de afectacións ao tráfico. Segundo informou o Goberno, a partir das 22.00 horas do próximo luns e ata as 06.00 horas do martes producirase un corte total simultáneo da circulación en ambas as calzadas da AP-9. Isto débese ao traslado dun tendido eléctrico aéreo que atravesa a traza da AP-9 á altura da E-03 (quilómetro 64,757). Ademais da sinalización habitual reforzarán a sinalización vertical de obra co apoio dos paneis de sinalización variable da AP-9 e implantarán carteis informativos nos puntos inmediatos á saída da autoestrada.

ITINERARIOS ALTERNATIVOS

Todo o tráfico que circula pola AP-9 en sentido A Coruña, abandonará a vía pola saída anterior á zona da obra (saída 67, da ligazón de Santiago Norte). Como itinerario alternativo exponse o traxecto pola SC-20 Sentido Norte, se o destino é a A-54 ou o aeroporto de Santiago, e pola SC-20/N-550 con destino Sigüeiro (enlace do quilómetro 55), con posibilidade de retomar a AP-9 en sentido A Coruña.

En canto ao tráfico que circula pola AP-9 en sentido Pontevedra, sairá da autoestrada na ligazón de Sigüeiro (saída 55) e como itinerarios alternativos proponse o traxecto pola N-550 en sentido Pontevedra, coa alternativa da ligazón co periférico SC-20 e posibilidade de tomar a AP-9 en sentido Pontevedra na ligazón de Santiago Norte (quilómetro 67).

Afectacións ao tráfico na AP-9 | Fonte: MITMA