O Goberno galego volve esixir ao Ministerio "concreción e certezas" sobre a chegada dos trens Avril

A conselleira de Infraestruturas e Mobilidade, Ethel Vázquez, esixiu novamente este luns "concreción e certezas" ao Ministerio de Transportes, Mobilidade e Axenda Urbana sobre a chegada dos trens Avril, que garantan un AVE galego completo e competitivo. Ethel Vázquez confirmou nun acto en Pontevedra que o goberno galego dirixiuse ao Ministerio de Transportes nesta xornada para que "concrete certezas sobre a chegada dos trens Avril" e tamén demandou "certezas sobre cantos trens Avril de rodaxe desplazable chegan a Galicia".

"É un asunto prioritario", subliñou a conselleira, que afirmou que "Galicia precisa esas certezas sobre unha data concreta". En resposta a preguntas dos xornalistas, a titular de Infraestruturas da Xunta de Galicia lembrou que, "a día de hoxe", o goberno autonómico non ten datas, "máis aló desa información do pasado de outubro, do primeiro trimestre do 2024".

Vázquez Mourelle tamén reiterou que no executivo autonómico recibiuse "con sorpresa" a contestación no Congreso dos Deputados sobre a chegada dos trens Avril, contestación "que era moi xenérica" e que se limitaba a sinalar que sería "canto antes" o que, segundo a conselleira "crea incerteza". "O que pedimos desde a Xunta son certezas e concreción", insistiu, e subliñou que quere "coñecer os criterios de repartición" dos trens no territorio nacional. "Así o necesitamos, así o xustificamos e así o vimos demandando", sentenciou.

Segundo apuntou, a Xunta realizou un estudo que indica a necesidade de dispor de 7 trens Avril e 6 frecuencias diarias "para que Galicia teña unha garantía de mobilidade adecuada ás súas necesidades de conexión Galicia-Madrid", asegurando o servizo de AVE tamén ás cidades da Coruña, Santiago, Vigo e Pontevedra.