Xuventudes Socialistas, tras as manifestacións: "O señor Feijóo cambiou a Marcial Dorado por Amanecer Dorado"
Condena os ataques ás sedes que ven como "a perda" do Goberno por parte da dereita
Por Europa Press / Redacción | SANTIAGO | 09/11/2023 | Actualizada ás 13:45
O secretario xeral de Xuventudes Socialistas, Xurxo Doval, condenou as manifestacións e actos violentos nas sedes socialistas e sinalou que "non é unha toma das rúas" contra a lei de amnistía, senón que é "un perder", por parte da dereita, do que "eles pensan que é un patrimonio seu" que é o Goberno de España. Así o dixo este xoves en rolda de prensa onde lamentou que "non son" un posicionamento contra a amnistía, senón unha "loita contra a propia democracia".
"Levan 40 anos sen entender que as regras da política cambiaron. Que vivimos nunha democracia, onde quen suma goberna e seguirán sen entender que durante os próximos catro anos haberá un goberno de esquerdas, presidido polo partido socialista e onde o señor Feijóo terá que reformular a súa actividade política", apostilou.
Xurxo Doval indicou que o actual líder do PP, Alberto Núñez Feijóo, "cambiou un Dorado, por outro". "Acabamos de pasar de Marcial Dorado, a Amanecer Dorado", remarcou. Así, condenou todas as manifestacións "non só de desobediencia civil", senón tamén de "enaltecer ou tentar provocar" que as forzas e corpos de seguridade "levántense" contra o Goberno.
"A realidade non é que rompa España. O que rompe é toda a rede caciquil, de abuso policial e político que durante anos a dereita neste país quixo establecer", esgrimiu. Por todo iso preguntouse a que vén "este ruído", se "teñen medo" a non estar no poder para manterse unidos ou a que o Goberno siga avanzando e progresando. "Ante isto hai que responder como nunca. Coa convivencia, co diálogo, que todos entremos no proxecto de España. Fronte ao seu ruído non haberá os nosos odios, senón a nosa indiferenza e, por tanto, temos como socialistas que reivindicar todo este traballo", sentenciou.
