A tempada de pesca fluvial de 2024 irá do 17 de marzo ao 31 de xullo
Como excepción atópanse as augas salmoneiras e de montaña, onde empezará máis tarde, o 1 de maio.
Por Europa Press / Redacción | SANTIAGO DE COMPOSTELA | 10/11/2023 | Actualizada ás 16:24
A tempada de pesca fluvial de 2024 irá, con carácter xeral para a troita, do 17 de marzo ao 31 de xullo, segundo o acordado este venres no Consello Galego de Pesca Continental. Como excepción atópanse as augas salmoneiras e de montaña, onde empezará máis tarde, o 1 de maio.
Este órgano, presidido pola directora xeral de Patrimonio Natural, Belén del Campo, fixou co sector as condicións para exercer a actividade. A orde anual publicarase proximamente e regulará os períodos hábiles de pesca, coas respectivas normas e determinacións de cada especie, con cotas de capturan que recollen as propostas dos consellos provinciais de pesca.
Nos cotos de pesca intensiva e nos tramos de pesca sen morte, poderase pescar ata o 30 de setembro, mentres que nos cotos con convenio, con carácter xeral a tempada prolongarase ata a mesma data na modalidade sen morte. No que respecta ao salmón, os pescadores poderán desenvolver a súa actividade a partir do 1 de maio e ata o 31 de xullo. As cotas de captura desta especie no río Mandeo (A Coruña) establécese en cinco exemplares; nos ríos Masma e Salmeán (Lugo), a cota será de 15 e 10 exemplares, respectivamente; e no Miño (Ourense), o límite será de oito salmóns.
No caso da provincia de Pontevedra estableceuse unha cota de 15 exemplares para o río Ulla, cunha redución dun 50 %, mentres que o Lérez continuará vedado. O límite segue sendo dun salmón por pescador e día. Polo que respecta ao reo, mantense o período xeral de 1 de maio a 31 de xullo, prolongándose ata o 30 de setembro nalgúns cotos.
Así mesmo, expuxéronse os principais resultados da posta en marcha do plan de manexo das poboacións de corvo mariño grande en Galicia, tras constatar a incidencia que esta especie está a ocasionar sobre as poboacións piscícolas, especialmente no caso dos salmóns. Este plan desenvolveuse en 11 cotos das catro provincias, realizándose un total de 40 percorridos de censado.
