O grao en deseño no campus de Pontevedra ten "un futuro prometedor"

O conselleiro de Cultura, Educación, FP e Universidades, Román Rodríguez, e o reitor da Universidade de Vigo, Manuel Reigosa, visitaron este venres a sede provisional do Grao de Deseño, no Edificio da Xunta na rúa Benito Corbal, en cuxo acondicionamento a administración autonómica investiu 190.000 euros. Trátase dunha nova titulación que "tivo unha gran acollida, cubrindo a totalidade das 45 prazas ofertadas", segundo destacou o conselleiro. Aínda que, finalmente, son 54 os alumnos que estrearon esta titulación "porque sempre hai empates" nas notas de acceso, explicou o reitor.

Román Rodríguez vaticinou un "futuro prometedor do Grao en Deseño no marco do Campus CREA" e sinalou "o acerto da Universidade de Vigo na súa aposta por este grao", que entronca directamente cos valores do Campus da Creatividade que impulsa a institución académica na cidade do Lérez. Trátase dun proxecto que especializa as titulacións impartidas en Pontevedra nas áreas relacionadas coa arte, a comunicación, a creatividade ou o deporte, segundo explicaron.

O conselleiro indicou que este grao "ten unha repercusión moi significativa" na economía, polo que espera que "teña moito éxito" e poida contribuír a que o conxunto do tecido empresarial galego "teña un plus de competitividade". "Traballamos en permanente diálogo coas universidades para construír unha oferta de titulacións adaptada aos tempos, ás demandas socioeconómicas e do alumnado", dixo Román Rodríguez.

MASTER EN DESEÑO

Á Facultade de Deseño, xunto co novo grao de Deseño, pertence tamén o máster en Deseño e Dirección Creativa en Moda, que se imparte na Facultade de Belas Artes. Os contidos do novo grao agrúpanse en catro cursos académicos, dous comúns de formación básica e dúas con optativas que orientan ao alumnado na súa especialización. En concreto, conta con dúas mencións, unha en Deseño gráfico e dixital e a outra en Deseño de moda.

Román Rodríguez tamén visitou en Pontevedra a Facultade de Ciencias da Educación e do Deporte, onde comprobou o resultado das obras para mellorar os espazos para a investigación centrada na Educación física. "Parece un ximnasio pero é un centro de investigación", chanceou. Cun investimento de 331.000 euros por parte da Xunta, o novo espazo conta cunha superficie de algo máis de 204 metros cadrados, na que se instalou unha nova sala de neuromusculación.

Deseño de compoñentes metálicos de gran tamaño | Fonte: AIMEN - Arquivo