A CHMS expón o novo Plan de Xestión do Risco de Inundación e conciencia dos riscos

O presidente da Confederación Hidrográfica Miño-Sil, José Antonio Quiroga, participou este martes na xornada de presentación do Plan de Xestión do Risco de Inundación (PGRI) da Demarcación do Miño-Sil, segundo ciclo, nun acto con máis dun centenar de representantes de administracións, colectivos e particulares. "As inundacións constitúen un risco natural que ao longo do tempo provocaron danos ás persoas e aos seus bens, polo que é importante loitar contra os efectos destas a través da implantación de sistemas de alerta, da coordinación entre as distintas AAPP, da corrección hidrolóxico-forestal e da correcta aplicación das medidas de ordenación do territorio", subliñou Quiroga

O novo PGRI da Confederación mellora algúns aspectos xa identificados no ciclo anterior, como unha mellor definición dos indicadores de avaliación; maior énfase na introdución de medidas de retención natural da auga (infraestruturas verdes), como alternativa máis adecuada fronte a medidas de protección tradicionais; emprego dunha nova metodoloxía de análise custos/beneficios; visibilizar e valorizar os efectos do cambio climático; e incorporar a Estratexia Nacional de Protección Civil e os novos Plans Especiais Autonómicos de Emerxencia ante o Risco de Inundacións.

Ademais, entre o obxectivo principais destes Plans está a concienciación social dos riscos das inundacións e das estratexias a seguir; ademais da total coordinación administrativa e da mellora de coñecemento entre os actores involucrados na xestión do risco de inundación (Administracións Locais, Protección Civil, etc.) como clave para a prevención e a preparación ante calquera incidencia. Tal e como destacou José Antonio Quiroga, "é fundamental que as administracións e tamén os cidadáns coñezan a existencia das ferramentas de consulta dispoñibles", porque estas poden resultar "moi útiles para evitar situacións sobrevindas, susceptibles de producir danos ás persoas e ou aos seus bens".