A USC terá un orzamento de 314 millóns en 2024, o segundo maior orzamento público en Galicia despois da Xunta
Algúns dos retos futuros pasan pola descentralización da investigación, mellorar a proxección para manter matrículas, captar estudantes e fomentar a internacionalización.
Por E.P. | SANTIAGO DE COMPOSTELA | 30/11/2023 | Actualizada ás 19:42
A Universidade de Santiago de Compostela (USC) contará cun orzamento de 314,4 millóns de euros en 2024, o que se traduce nun incremento do 9,2% respecto ao ano anterior. Esta cifra global supón o segundo maior orzamento público en Galicia despois da Xunta.
O Claustro da USC aprobou este xoves --con 92 votos a favor, 12 en contra e 14 en branco-- as liñas mestras destas contas.
O xerente da USC, Xavier Ferreira, subliña que, "un ano máis, a Universidade é quen de conseguir máis recursos fóra do Plan de Financiamento, que actúa como garantizadora de certa estabilidade, pero que non é suficiente para acometer políticas que melloren a institución". E é que o aumento orzamentario en 2024 será maior que o plan de financiamento.
De feito, Ferreira considera que son unhas contas conservadoras en relación cos compromisos adquiridos. Algúns dos retos futuros pasan pola descentralización da investigación, mellorar a proxección para manter matrículas, captar estudantes e fomentar a internacionalización, ademais de conseguir unha USC máis sustentable e eficiente.
O teito de gasto non financeiro queda fixado en preto de 242 millóns de euros. Con todo, este teito non ten en conta "a especial singularidade" da USC, na medida en que unha parte substancial dos seus ingresos e gastos son afectados, o que se ten en conta nos criterios fixados pola Autoridade Independente de Responsabilidade Fiscal (AIReF). De acordo con eses criterios, a cifra máxima de gasto non financeiro ascende a algo máis de 319 millóns de euros. O Claustro aprobou o teito de gasto por 105 votos a favor, dous en contra e 27 en branco.
