CSIF reclama á Xunta: "A Terapia Ocupacional é a gran esquecida por parte do noso servizo de saúde"

A Central Sindical Independente e de Funcionarios (CSIF) reclamou este luns que os orzamentos de 2024 da Xunta inclúan a dotación de prazas de terapeuta ocupacional para "o correcto desenvolvemento" do Plan de Saúde Mental de Galicia.

A través dun escrito remitido á Dirección Xeral de Recursos Humanos do Sergas, o sindicato xustifica a demanda destas prazas por ser "unha categoría clave á hora de cumprir os obxectivos do devandito plan", dado que o seu traballo "está estreitamente relacionado co aumento da autonomía dos pacientes e coa normalización social e desestigmatización das persoas que padecen un trastorno mental".

CSIF lembrou que nos próximos orzamentos inclúese a creación de prazas de enfermeiras especialistas en saúde mental, psicólogos clínicos, psiquiatras, TCAE e traballadores sociais de Hospital, "pero, unha vez máis, a Terapia Ocupacional é a gran esquecida por parte do noso servizo de saúde".

A Central Sindical denunciou que todas as áreas sanitarias contan cun número de profesionais desta índole "moi por baixo das necesidades reais", o que implica "sobrecargas de traballo e que non se poidan cubrir todas as áreas asistenciais susceptibles de contar con persoal con esta categoría". Servizos como as Unidades de Ictus, as de Hospitalización breve de saúde mental, as de Críticos, de Lesión Medular ou os Hospitais de día de saúde mental infantil e xuvenil "deberían de contar cun Terapeuta Ocupacional, pois é a peza fundamental para rehabilitar, potenciar e manter as habilidades dos pacientes para realizar as actividades da vida diaria, eixos de acción, precisamente, nos que está estruturado o Plan Galego de Saúde Mental", afirman.

Unha rolda de prensa de CSIF en Pontevedra. | Fonte: CSIF