Galicia e a Bretaña Francesa traballan xuntas para defender en Bruxelas a importancia da pesca

O conselleiro do Mar, Alfonso Villares, aproveitou a súa presenza en Bruxelas (con motivo da negociación das cotas e os totais admisibles de capturas (TAC) para augas europeas en 2024) para reunirse este luns coa delegación da Bretaña francesa, encabezada por Daniel Cueff, vicepresidente de Mar e Litoral desta importante zona pesqueira gala coa que Galicia comparte a presidencia do Grupo Central Marítimo e de Pesca da Conferencia de Rexións Periféricas Marítimas (CRPM).

Alí, compartiron a idea de que está en xogo o futuro da pesca, polo que apostan por exercer o liderado nesta materia ante a CRPM. Neste novo encontro, entre ambos os políticos coincidiron na necesidade de que Europa avogue pola soberanía alimentaria, así como a demanda de que as políticas comunitarias en materia de pesca garantan a consecución do equilibrio ambiental, económico e social da actividade.

Con este fin elaborouse un programa para restablecer a importancia do sector pesqueiro de face á constitución da nova Eurocámara tras as próximas eleccións europeas, onde Galicia e Bretaña defenden a necesidade de ter a pesca como prioridade absoluta, segundo expón a Xunta, ao contrario do que ocorreu no último período co comisario de Medio Ambiente, Océanos e Pesca, Virginijus Sinkevicius.

Pola súa banda, o conselleiro do Mar, Alfonso Villares, reclamou que se produzan avances na negociación que se mantén no Consello de Ministros de Pesca da Unión Europea que debe fixar os totais admisibles de capturas (TAC) e cotas para 2024 en augas comunitarias, pois de momento "son escasos" fronte a proposta inicial presentada pola Comisión Europea.

O obxectivo de Galicia é que a súa frota poida dispor para o ano próximo dunhas cotas que "garantan un futuro sustentable tamén nos ámbitos social e económico", en equilibrio coas recomendacións científicas e o respecto ambiental. A aposta non debe ser, dixo o conselleiro, "limitar os recortes ou manterse", se non "poder pescar máis". O titular de Mar está a seguir xunto ao sector desde Bruxelas os debates a pesar de non formar parte da delegación negociadora española (composta polo Ministerio de Agricultura, Pesca e Alimentación e o Goberno valenciano en representación das comunidades autónomas).

Neste marco, manifestou a súa esperanza de que se poida conseguir un acordo positivo para a frota galega, aproveitando a oportunidade que supón a presidencia española do Consello da UE para mellorar a proposta e así conseguir os obxectivos marcados que permitan atender ás necesidades da frota e garantir o seu futuro. Alfonso Villares puxo en valor o esforzo da frota galega, unha das máis sustentables e das que mellor pesca do mundo, en base a criterios ambientais, pero tamén respectando os recursos e as condicións laborais.

Nesta xornada producíronse encontros con representantes do sector pesqueiro e coa secretaria xeral de Pesca, Isabel Artime. Ademais, mantense un contacto directo co conseller valenciano, José Luís Aguirre, que participa no cume dentro da delegación negociadora española que lidera o ministro Luís Planas.

Púxose de manifesto que entre os aspectos positivos están algunhas taxas plurianuais, que permitirán mellor xestión da actividade pesqueira. Con todo, mantense a desconfianza polo feito de que as propostas para algunha delas xérense en base a un recorte importante, como pode ser o caso do abadexo na zona do Cantábrico. Esta especie é, xunto co linguado e o merlán, tamén de interese para a frota galega, algunhas das que parecen centrar as principais discusións no cume.

Desde a Xunta achegouse tanto ao sector como ao Ministerio toda a información sobre as pesqueiras de relevancia para Galicia co obxectivo de conseguir elevar finalmente a capacidade de capturas que se recolle no documento coa proposta inicial que trasladou a Comisión Europea e é a base da negociación. Por exemplo, Galicia pide que se atenda ao impacto dos recortes e o peche no xurelo do Cantábrico e Gran Sol, que supuxeron un golpe de 11 millóns de euros ao sector e en especial á frota de cerco.