Un debate sobre a "vixencia" da Constitución eleva o ton entre os grupos no último pleno do ano
"Se non votan a favor, pesará sobre as súas conciencias", proclama Prado (PP) aos socialistas.
Por Europa Press / Redacción | | 20/12/2023 | Actualizada ás 20:00
O debate sobre unha iniciativa levada á Cámara autonómica polo PP para explicitar o "compromiso e apoio á plena vixencia" da Constitución que os populares ven ameazado polos acordos do PSOE con forzas independentistas elevou o ton dos discursos entre os grupos no último pleno do ano 2023.
A iniciativa defendida na sesión celebrada este mércores pola deputada e secretaria xeral do PP galego, Paula Prado, virou a un cruzamento de reproches entre os grupos. Mentres que os populares acusaban de "romper coa igualdade" entre españois aos socialistas, estes replicaron aos primeiros que carecían de "un mínimo de sentido de Estado"; mentres que o BNG sinalaba ao PP como responsable de usar a Carta Magna "como arma arreboladiza" contra os seus rivais políticos.
Todo isto no debate dunha iniciativa que saíu adiante co único voto a favor dos populares, xa que o BNG decidiu oporse e o PSdeG optou pola abstención. Antes, na quenda de peche, Paula Prado dirixiuse directamente aos socialistas para sinalarlles que en caso de non votar a favor do texto "pesaría sobre as súas conciencias".
Durante o seu defensa, Prado lembrou a figuras da transición como o fundador do seu partido, Manuel Fraga, ou o histórico dirixente comunista Santiago Carrillo para sentenciar que a "vontade" destes políticos "moi distintos" serviu para "tender pontes" a diferenza do que, di, ocorre na actualidade, cando "o PSOE e os seus socios queren construír muros entre os españois".
A encargada de defender a postura do PSdeG foi a deputada Paloma Castro, que manifestou o seu orgullo de pertencer ao Partido Socialista antes de acusar aos populares de empregar "os mesmos vellos argumentos" que Fraga empregou fai 45 contra a Constitución. A diferenza, ao seu modo de ver, foi que Fraga "entendía que había que aplicar" a Carta Magna, unha "mínima responabilidad e sentido de Estado" da que, segundo Castro, o PP actual carece. "Quizais en 2068 algún deputado virá a este Parlamento a pór en valor os valores da Lei de amnistía, quen sabe", ironizou Paloma Castro.
Pola súa banda, o nacionalista Daniel Castro tamén tirou de ironía para sentenciar que o PP é "o goberno das efemérides". "Como o turrón, a Constitución volve a casa por Nadal", espetou Castro, que afeou ao PP que pretenda "usar como arma arreboladiza contra os rivais políticos" a Carta Magna en lugar de sentar a falar de vías para "mellorala".
"A Constitución non se pode cambiar porque rompe España. Salvo que o diga a 'troika'. Aí faise rápido", sentenciou o nacionalista, que situou aos populares en posturas "antisistema" cando se sitúa, segundo afirmou, en contra de regular o mercado inmobiliario para cumprir co dereito á vivenda que está fixado na Constitución.
