As películas galegas candidatas ao XXII Mestre Mateo son as máis exitosas do ano
"Unha edición, a vixésimo segunda, con marca de participación nas categorías de longametraxe, programa e curtametraxe", explica nun comunicado a Academia Galega do Audiovisual.
Por E.P. | SANTIAGO DE COMPOSTELA | 10/01/2024 | Actualizada ás 20:55
A Academia Galega do Audiovisual pon en marcha hoxe as votacións para elixir as candidaturas finalistas nos premios Mestre Mateo. Un total de 173 producións foron presentadas para participar na presente edición, o que supón un descenso de 21 traballos con respecto ao 2023, segundo informa.
"Unha edición, a vixésimo segunda, con marca de participación nas categorías de longametraxe, programa e curtametraxe", explica nun comunicado no que resalta que "a categoría de mellor longametraxe dá conta da excelente colleita do audiovisual galego en 2023, con películas recoñecidas en festivais como 'O Corno' e a obra de animación 'O soño da Sultana'.
'Matria' e 'Sica' son outros dos títulos nunha lista na que tamén están presentes 'Fatum' e a película de ciencia ficción aclamada pola crítica 'Salta!'. Por outra banda, resalta a produción de curtametraxes, un 36,3% superior á edición anterior, cunha mención especial á categoría de animación, na que se presentan máis do dobre de traballos. Tamén destaca un incremento do 21,2% nas obras que compiten na categoría de mellor programa. Este primeiro prazo de votación estará aberto hata o 31 de xaneiro.
