O dinosauro de Vigo arrasa nas redes sociais
Crean un perfil en FB e en twitter co famoso dinosauro instalado na rúa Rosalía de Castro. O incendio de Freiremar serviu para facer numerosas composicións con este seto sauro.
Por Galicia Confidencial | Vigo | 05/08/2015 | Actualizada ás 11:00
Hai pouco máis de dous meses que o “Dinoseto”, un seto con forma de dinosauro, é a nova atracción de Vigo. Primeiro o concello colocouno nun parque infantil de Navia, pero visto o seu éxito, decidiu trasladalo á centrica rúa Rosalía de Castro, onde foi motivo de numerosos comentarios, críticas e artigos xornalísticos.
De feito, foi tal o seu éxito que mesmo xurdiu un perfil do famoso sauro verde en Twitter e FB, que ten xa máis de 6.000 siareiros. Nestas redes sociais apareceron nos últimos días vídeos musicais versionados sobre a figura do “Dinoseto”.
Tamén numerosas composicións fotográficas que aproveitan o incendio que este luns afectou á fábrica de Freiremar para facer protagonista do mesmo ao famoso dinosauro. Unhas composicións que están sendo moi comentadas a través das redes sociais.
