Piden a detención dunha empresaria de Lalín acusada de estafar 128.000 euros a un cliente tras non acudir ao xuízo

A Sección Cuarta da Audiencia Provincial de Pontevedra suspendeu o xuízo sinalado para este martes por un delito de estafa contra a administradora única da empresa Inversiones rentables para ti SL, con sede en Lalín. O motivo da suspensión foi que a acusada non se presentou ante o tribunal provincial, polo que a Fiscalía solicitou que se acorde a súa detención e ingreso en prisión para garantir a súa comparecencia. A sala teno que estudar.

Esta empresaria está acusada de estafar 128.000 euros a un home por uns supostos investimentos en petróleo ficticios, segundo recolle o escrito do fiscal. Con ese diñeiro a acusada realizou distintas compras en varios locais. O fiscal pide para a acusada unha pena de seis anos de prisión por un suposto delito continuado de estafa, a inhabilitación do dereito de sufraxio pasivo durante ese tempo e o pago dunha multa de 12 meses a razón de 15 euros diarios. En concepto de responsabilidade civil, o Ministerio Público pide que a acusada indemnice ao estafado con 128.000 euros, con aplicación dos intereses de demora correspondentes.

Entrada da Audiencia Provincial de Pontevedra | Fonte: Gustavo de la Paz - Arquivo