Precísanse doazóns dos grupos A+, 0+, 0- e B-

As reservas de sangue dos grupos A+, 0+, 0- e B-, atópanse en nivel baixo, polo que a Axencia de Doazón de Órganos e Sangue (ADOS) instou á cidadanía a doar. Nun comunicado, ADOS explicou que a metade dos grupos sanguíneos presentan niveis baixos, dous deles, A- e B+, niveis normais e outros dous, AB+ E AB-, presentan un bo nivel de sangue.

Así, lembraron que se necesitan aproximadamente 500 doazóns de sangue cada día para poder atender a todos os pacientes que o necesiten. Por iso, pon a disposición da poboación dez unidades móbiles para a doazón que percorren diariamente os concellos galegos, e sete locais permanentes de doazón nas principais cidades de Galicia.

Entre os lugares nos que se atoparán nos próximos días as unidades móbiles están A Coruña, Santiago, Lugo, Ribadeo, Ourense, Xinzo, Vigo e Pontevedra, entre outras. Aqueles que desexen coñecer máis información poden consultar a páxina web de ADOS, ados.sergas.gal, as súas redes sociais e chamar ao seu teléfono gratuíto 900 100 828.

Unidade móbil da Axencia de Doazón de Órganos e Sangue (ADOS) / Europa Press / Europa Press