Un mozo con síndrome de Down leva máis de ano e medio á espera de certificado de discapacidade, segundo a CIG
A familia xa presentou dúas reclamacións ante a valedora do Pobo con "nulo resultado" ata o momento nesta tramitación.
Por Europa Press / Redacción | SANTIAGO DE COMPOSTELA | 03/02/2024 | Actualizada ás 19:30
A CIG denuncia que un mozo con síndrome de Down leva máis de ano e medio á espera polo certificado de discapacidade, un documento sen o que non pode acceder ao mercado laboral nin presentarse a unha oposición.
Nun comunicado, o sindicato alerta da situación "precaria" que vive este mozo de 23 anos que conta cunha titulación académica, pero que non pode exercer porque a Xunta "non dá resolto a súa solicitude". Todo iso carréxalle un "grave prexuízo".
Critica que esta demora se debe a "a falta de persoal", xa que o número de empregados públicos para estas tarefas "segue sendo insuficiente para sacar adiante as resolucións nun tempo razoable".
Así mesmo, a familia xa presentou dúas reclamacións ante a valedora do Pobo con "nulo resultado" ata o momento nesta tramitación. A CIG esixe ao Goberno galego "menos propaganda e promesas electorais e máis investimentos en persoal e en servizos públicos".
