Podemos Galicia e Esquerda Unida coinciden en artellar un espazo común e plural
Podemos Galicia e Esquerda Unida informan dun recente encontro no marco das negociacións de cara a unha candidatura conxunta para as xerais. Polo de agora non hai fórmulas concretas pero, como apuntaba a coordinadora de Yolanda Díaz esta fin de semana, as negociacións avanzan.
Por Galicia Confidencial | Santiago de Compostela | 24/08/2015 | Actualizada ás 22:49
"Tras o recente encontro de Podemos Galicia con EU queremos trasladar que ambas as dúas formacións compartimos a análise da actual realidade social e política", explican dende Podemos.
Dende Esquerda Unida sinálase que "dende esta visión compartida, xorde a necesidade de participar nun espazo común e conformado pola vontade de persoas dispostas a traballar para aglutinar forzas e provocar un cambio real que supere ao escenario partidista actual. Ambas organizacións coincidimos na importancia do eixo programático que ha de ser o elemento de unión prioritario e irrenunciable co que, colectivamente, debemos definir o proxecto que provoque o cambio e que vele polo ben común".
As dúas formacións destacan a importancia de seguir a manter contacto con outros actores sociais e políticos e explorar as vías de colaboración para a xestación dun espazo integrador o máis amplo e plural posible. Eu destaca en concreto que "Compostela Aberta, Ferrol en Común ou Marea Atlántica son exemplos de que a unidade popular é o que demanda o pobo e que naceu para quedarse e mellorar as cousas".
Pola súa banda, Podemos Galicia di que segue traballando pola confección do bloque social e político do cambio.
