Rueda di que ampliará o acceso á fecundación in vitro a mulleres de entre 40 e 45 anos na sanidade pública
Avanzou no mitin de Ferrol que a súa "primeira" decisión, se revalida o goberno, será impulsar as primeiras matrículas universitarias gratuítas
Por Europa Press / Redacción | SANTIAGO DE COMPOSTELA | 14/02/2024 | Actualizada ás 10:57
O presidente da Xunta e candidato do PPdeG á Presidencia, Alfonso Rueda, comprometeuse a ampliar o acceso á fecundación in vitro na sanidade pública para mulleres de entre 40 e 45 anos, nun encontro na Coruña con representantes da sociedade coruñesa. Tamén prometeu conxelación de óvulos sen acreditar unha patoloxía.
Nel, avanzou tamén novas actuacións en materia de mobilidade, como un servizo de 'intercity express' para a conexión do sete cidades galegas, en "transporte rápido sen paradas" por autobús e para "conectar" as estacións intermodais.
Todo iso nun discurso no que reivindicou ao PPdeG como o partido da tranquilidade fronte a "discusións identitarias e ombliguistas" doutras formacións. "Forma parte do ADN", dixo sobre os seus rivais, dos que manifestou que "outra cousa é que agora tenten blanquear e disimular".
DOCE MEDIDAS
O presidente da Xunta e candidato popular á reelección, Alfonso Rueda, articulou unha batería de doce medidas que prevé levar a cabo nos seus cen primeiros días do novo mandato se logra a confianza dos galegos o vindeiro domingo 18 de febreiro e continúa á fronte do Executivo autonómico tras a cita coas urnas.
As promesas tocan diversas áreas e van desde o impulso de novas prazas de residencia a ampliar o calendario de vacinación infantil, aínda que foi o propio candidato quen se encargou de verbalizar no mitin da pasada noite en Ferrol cal será a súa "primeira medida": a gratuidade das primeiras matrículas universitarias en todos os graos.
Este paso, reafirmou á vez que prometía gobernar "para todos" afastado do "sectarismo" que atribúe ás forzas de esquerda --con especial foco sobre o BNG--, é o que permitirá "completar" o circuíto da educación pública "gratis" desde as escolas infantís ata a etapa da universidade.
Pero dentro dos seus primeiros doce compromisos Rueda fai oco para a política fiscal e sitúa manter as bonificacións do imposto de Sucesións para as herdanzas entre fillos e pais e iniciar a rebaixa para outros parentes; así como novos programas para o impulso do emprego feminino "de alto valor engadido" e para a primeira experiencia de mozas na empresa.
Así mesmo, os populares prevén priorizar a dotación de chan público empresarial da Xunta a custo cero durante os primeiros 8 anos de actividade, e articular plans directores para os sectores do automóbil, naval e TIC, e a aprobación da primeira Lei de intelixencia artificial de Europa --o seu Executivo está a traballar no anteproxecto--.
En materia de infraestruturas, Rueda tamén dá a súa palabra de que, neste período de 100 días, impulsará avances no deseño das autovías Tui-A Guarda e Nadela-Sarria.
