A Comisión Europea recolle a proposta do BNG para incluír os pélets na directiva de contaminación marítima
A eurodeputada do Bloque destaca que a medida "supón un paso adiante moi importante na mellora da protección da costa galega".
Por Europa Press / Redacción | SANTIAGO DE COMPOSTELA | 16/02/2024 | Actualizada ás 18:37
A Comisión Europea (CE) recolleu as alegacións do BNG á directiva de contaminación marítima para incluír as verteduras de pélets e a perda de colectores no transporte realizado por buques.
Segundo informa o BNG nun comunicado, con esta modificación do texto actual de 2005 refórzase a aplicación do Convenio Internacional para a Prevención da Contaminación polos Buques da Organización Marítima Internacional (OMI).
Así, a eurodeputada do Bloque, Ana Miranda, subliña que esta decisión "supón un paso adiante moi importante na mellora da protección da costa galega", xa que obriga á UE a revisar en cinco anos se se inclúen os derrames de pélets como obxecto de sancións, así como empraza a mellorar a transparencia do sistema CleanSeaNet --sistema da Axencia de Seguridade Marítima Europea que comezou a funcionar en 2007 e que monitora por satélite os buques e vixía verteduras--.
Na presentación de emendas, Miranda denunciou falta de transparencia sobre a vertedura de buques, polo que defendeu a publicación periódica de forma anual de informes que inclúan a monitorización de buques, as verteduras detectadas e o tipo de vertedura.
Contrasta esta situación coa "ineficacia e desidia do Partido Popular, máis preocupado en manipular e ocultar a realidade que en traballar por defender os intereses dos galegos".
