O prezo do aluguer sobe un 6,6 % en Galicia no último ano
Respecto do mes anterior baixa un 0,2% en xaneiro.
Por Europa Press / Redacción | SANTIAGO DE COMPOSTELA | 19/02/2024 | Actualizada ás 15:31
O prezo da vivenda de aluguer en Galicia subiu un 6,6 % na súa variación interanual no mes de xaneiro, cun prezo de 8,61 o metro cadrado, mentres que a súa variación mensual foi negativa (-0,2 %), tal e como reflicten os datos do Índice Inmobiliario Fotocasa.
Segundo trasladou Fotocasa a través dun comunicado, o prezo do arrendamento "continúa á alza de maneira significativa en todas as comunidades autónomas" e volve chegar a prezos máximos, alcanzando nivel nacional un prezo "marca" en xaneiro de 2024.
Isto débese, segundo afirmou a directora de Estudos e portavoz de Fotocasa, María Matogueiras, ao "gran desequilibrio" que sofre o mercado entre a oferta e a demanda, que "non permite que o prezo se axuste". Ademais, as "inxerencias lexislativas e macroeconómicas no mercado" impactan na súa volatilidade deixando "consecuencias tan graves como a redución da oferta, que se sitúa baixo mínimos en 2024".
A pesar disto, Galicia é das comunidades autónomas que menos incrementou o prezo interanual, só por diante de Cataluña (6,3 %), Murcia (6,0 %), Castela a Mancha (5,1 %) e Estremadura (2,8 %). Así mesmo, non entra dentro das comunidades co prezo da vivenda de aluguer máis caras (que superan os 10 o metro cadrado ao mes), que son Madrid, Baleares, Cataluña, País Vasco, Canarias, Comunidade Valenciana, Cantabria, Navarra e Andalucía.
PROVINCIAS GALEGAS
Por provincias galegas, a orde de incrementos interanuais sitúa en primeiro lugar a Pontevedra (7,5 %), a continuación Ourense (5,7 %) e logo A Coruña (5,4 %), mentres que en Lugo baixa un -0,3%.
Doutra banda, con respecto aos prezos de aluguer de vivenda por provincias, é Pontevedra a máis cara con 9,79 por metro cadrado ao mes, seguida da Coruña con 8,45 por metro cadrado ao mes, Lugo con 6,66 ? por metro cadrado ao mes e a máis barata Ourense con 6,64 ? por metro cadrado ao mes.
MUNICIPIOS GALEGOS
No respectivo a municipios, oito dos nove analizados presenta un incremento no prezo das vivendas en aluguer respecto ao ano anterior, sendo Lugo a cidade na que máis incrementou (un 11,1 % en xaneiro), seguida por Ourense cun 10,5 %, Narón cun 8,6 %, Santiago cun 8,4 %, A Coruña cun 6,5 %, Vigo cun 5,3 %, Pontevedra cun 4,8 % e Ferrol cun 3 %.
En canto ao prezo do metro cadrado en xaneiro, Sanxenxo é a cidade máis cara para alugar, cun prezo de 15,88 o metro cadrado ao mes, seguido da Coruña (10,21 ?/m2), Vigo (9,94 /m2), Santiago (9,42 /m2), Pontevedra (8,23/m2), Lugo (7,08 /m2), Ourense (7,04 /m2), Ferrol (6,43/m2) e Narón (6,06 /m2).
