Admitidos 17 aspirantes para cubrir prazas dos servizos xerais do Sergas e 277 auxiliares de enfermaría

O Sergas publicou os 17 aspirantes que foron seleccionados, por concurso de méritos, na categoría de persoal de servizos xerais e os 277 para técnico en coidados auxiliares de enfermaría. O Diario Oficial de Galicia (DOG) publicou este mércores a resolución da Dirección Xeral de Recursos Humanos do Servizo Galego de Saúde, pola que se declaran as persoas definitivamente seleccionadas.

Mediante o sistema de concurso de méritos, ofertaron 17 prazas para a categoría de persoal de servizos xerais, das cales 15 corresponden á quenda de acceso libre e dúas á de discapacidade xeral e 277 prazas para a categoría de técnico en coidados auxiliares de enfermaría, das cales 254 corresponden á quenda de acceso libre e 23 á de discapacidade xeral.

Estas 294 prazas engádense ás 985 ofertadas a través do sistema concurso-oposición para estas dúas categorías de persoal estatutario, correspondendo 196 á categoría de persoal de servizos xerais e 789 á categoría de técnico en coidados auxiliares de enfermaría que realizaron o exame da fase de oposición en novembro, e das que xa foron publicadas as puntuacións provisionais da fase de oposición. Segundo informou a Xunta, o 93,2 % das persoas participantes neste proceso selectivo son mulleres. Coa publicación desta resolución abren o prazo dun mes, que finaliza o 21 de marzo, para que os seleccionados presenten a documentación correspondente.

Oposicións Sergas | Fonte: SERGAS - Arquivo