A Xunta non actuará en zonas de vivenda tensionada

O presidente da Xunta en funcións, Alfonso Rueda, reafirmouse en que o Executivo galego non prevé declarar de oficio zonas de vivenda tensionada, pero, aínda que reiterou o rexeitamento da Administración galega cara á lei de vivenda, afirmou que a cumprirá e analizarase a cuestión sempre que haxa petición dun concello. Iso si, deberá estar "moi ben argumentada".

"Se hai esa petición, por suposto que lle daremos para adiante. Pero insisto, haberá que facela xustificadamente e argumentala", afirmou, preguntado en relación a este asunto e despois de que a rexedora da Coruña, a socialista Inés Rey, instase á Xunta a "porse a traballar" para declarar A Coruña mercado tensionado.

Rueda manifestou ser consciente de que é preciso que baixe o prezo dos alugueres, pero mostrouse convencido de que esta non é a vía adecuada. En todo caso, remarcou que, mentres a lei "estea en vigor", o Executivo galego vaina a "cumprir", o que implica que "se algún Concello pide e xustifica" ser zona tensionada, pois a normativa "será aplicada".

"Tería que ser unha iniciativa dun Concello e con moito impacto. Teñen que argumentar moi ben cales son as razóns, cal é a situación e cales serían os beneficios", advertiu, antes de engadir que por agora, "loxicamente", non chegou ningunha solicitude. "Non chegou ningunha documentación nin solicitude, incluído do Concello da Coruña", remarcou.

O presidente da Xunta en funcións, Alfonso Rueda, preside a reunión do Consello | Fonte: XUNTA