Ampliado o prazo para solicitar as axudas para mellorar explotacións e incorporar traballadores ao agro
Poderanse pedir as axudas económicas ata o 22 de abril.
Por E.P. | SANTIAGO DE COMPOSTELA | 29/02/2024 | Actualizada ás 18:14
A Xunta ampliou ata o 22 de abril --un mes máis-- o prazo para pedir as axudas para apoiar os investimentos nas explotacións agrícolas e para a creación de empresas de agricultores novos ou para persoas de entre 41 e 55 anos.
Así, os interesados disporán de máis tempo para tramitar estas subvencións que tiñan como prazo inicial dous meses. A ampliación publicarase nas próximas semanas no Diario Oficial de Galicia (DOG).
Segundo lembrou o Executivo galego, a convocatoria destas axudas foi publicada no DOG o 22 de xaneiro, cunha dotación económica de 47 millóns de euros.
Estas subvencións pertencen ao Plan estratéxico da política agraria común (Pepac) de España 2023-2027. O orzamento está confinanciado nun 12% pola Administración xeral do Estado, nun 28% pola Xunta de Galicia e nun 60% polo Fondo Europeo Agrícola de Desenvolvemento Rural (Feader).
Con estas axudas queren mellorar a estrutura produtiva das explotacións galegas e avanzar na consecución dunha adecuada dimensión e un correcto equilibrio dos seus factores de produción co obxectivo de mellorar a competitividade.
