A USC aposta por fomentar o cooperativismo no V Semana da Economía Social

A Facultade de Ciencias Económicas e Empresariais da USC inaugurou o V Semana da Economía Social, coa que, segundo a profesora que impulsou a actividade, María Teresa Cancelo, preténdese difundir esta forma de asociación económica nas aulas e fomentar o emprendemento social. As actividades consisten no acto central, celebrado este mércores, nunha exposición e na mostra de bibliografía sobre cooperativismo feminino.

Así mesmo, abordarán a economía social tamén nas aulas, algo que a conselleira de Promoción do Emprego e Igualdade en funcións, Elena Rivo, asegurou que, moitas veces, pásase "por alto". "Nunca falamos dos centros especiais de emprego, ou das sociedades laborais", continuou Rivo, que quixo falar desde a súa perspectiva como profesora de Administración de Empresas.

Pola súa banda, a vicepresidenta do Foro de Economía Social, Carmen Rodríguez, explicou o concepto que, segundo a súa percepción, é "unha forma de promover, formar e informar", en concreto, "outra forma de traballar". Así mesmo, engadiu que as cooperativas son as entidades "con maior peso" e "máis antigas" dentro da economía social.

Doutra banda, o decano da facultade, Xosé Ramón Doldán, sinalou que "sería interesante tratar de introducir estas cuestións" no plan de estudos, plan que nestes momentos está a modificarse.

EXEMPLOS DE EMPRESAS DENTRO DA ECONOMÍA SOCIAL

Co fin de trasladar a súa experiencia persoal ao alumnado, o acto contou coa presenza de catro emprendedores destas iniciativas. Xaime López de Urdime S. Coop. Galega, Rubén da Silva de Ozono Multimedia SLL, Luís Penido López de Trameve Centro Especial de Emprego e Víctor Manuel Branco de Primicias Raíña, animaron aos presentes a crear os seus propios proxectos empresariais.

Por último, Elena Rivo, quen pechou o acto, engadiu en apostar por un modelo de economía social no tocante a sectores en risco de exclusión: "O mellor que podemos facer por persoas con drogodependencia, vítimas de violencia de xénero, ou con algún tipo de discapacidade, é darlles un traballo, dignidade e autoestima", trasladou a conselleira en funcións.

Facultad de Económicas da USC | Fonte: Páxinas Galegas