Por Europa Press / Redacción | SANTIAGO DE COMPOSTELA | 11/03/2024 | Actualizada ás 13:12
A vicepresidenta segunda e conselleira de Medio Ambiente, Territorio e Vivenda, Ángeles Vázquez, asegurou que a Xunta "non se nega" á declaración de zonas de aluguer tensionado, aínda que "non o vai a facer de oficio", e pediu aos concellos que "avalen con documentos" a solicitude.
Así se manifestou a preguntas dos medios este luns nunha visita ao Biopolo da Sionlla, onde apuntou que de Santiago de Compostela non lles chegou ningunha solicitude e da Coruña chegoulles "unha instancia" á que solicitaron documentación que, tal e como asegurou, "aínda" non chegou ao departamento autonómico.
Sobre a postura da capital galega, Ángeles Vázquez insistiu en que "o que ten que facer a alcaldesa", Goretti Sanmartín, é "traballar". "Se ela quere dar resposta ao mercado tensionado, o primeiro que ten que facer é solicitalo. Non hai solicitude na Xunta, non existe instancia nin solicitude, o único que existe é unha declaración de intencións que se fai a viva voz", criticou.
Así mesmo, Vázquez reiterou que "hai que cumprir a lei", que pode parecer "máis ou menos estrita". Con todo, afirmou que esta normativa "consecuencias boas non vai ter ningunha".
ANÁLISE
Neste contexto, sinalou que o que ten que facer cada concello é "analizar que zona quere declarar como zona tensionada". Para iso, detallou, "ten que saber o número de grandes tenedores nesa zona, e só naqueles pisos ou vivendas que levan máis de 5 anos sen alugar pódeselles topar o prezo".
Tamén lembrou que hai que "perimetrar", facilitarlle á Xunta esa información e "planificar ao longo duns anos como lle vai a dar solución", así como "destinar o 20% de chan público a vivenda pública". "Iso é o que teñen que facer, non se se lles parece complicado ou non", aseverou.
Nesta liña, avanzou que no caso de Galicia "menos do 5% son grandes propietarios", mentres que "o 95% restante son persoas do montón, dos cales dese 95% o 35% dos propietarios de pisos que alugan son xubilados".
A partir de aí, opinou, o que hai que facer é "dar seguridade xurídica, para que aqueles pisos que están baleiros poidan saír a alugar". É nese punto no que a vicepresidenta segunda entende que hai que "traballar, profundar e axilizar as licenzas para que os promotores non estean dous ou tres anos sen poder construír".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.