Un xulgado de Ourense cita dúas persoas como investigadas por romper un valo de Hablemos Español
O presidente da Mesa pola Normalización Lingüística, Marcos Maceira, lembrou que "as campañas recorrentes contra a toponimia galega son un ataque á dignidade colectiva que non se pode admitir"
Por E.P. | OURENSE | 21/03/2024 | Actualizada ás 18:23
Dúas persoas están citadas como investigadas nun xulgado de Ourense supostamente romper un cartel nun valo promovido pola asociación Hablemos Español, co topónimo de Ourense "deturpado". Inicialmente tiñan que comparecer o próximo 3 de abril, pero esta cita foi suspendida a declaración xudicial, segundo informou A Mesa pola Normalización Lingüística.
O pasado mes de outubro, foron identificadas pola Policía Nacional como presuntas autoras de vandalizacións a un valo publicitario da asociación Falemos Español no mes de xuño. Aquel valo dicía "Bienvenidos a Orense, ciudad que en gallego se llama Ourense".
Neste sentido, o presidente da entidade en defensa da lingua, Marcos Maceira, lembrou que "as campañas recorrentes contra a toponimia galega son un ataque á dignidade colectiva que non se pode admitir" e do que "participan en moitas ocasións directamente organismos públicos".
"Ademais de valados insultantes ou chamamentos a incumprir a lei, atopámonos frecuentemente con vulneracións da lei promovidas desde as institucións públicas", manifestou Marcos Maceira, quen lembrou a recente resolución do Ministerio de Agricultura e Pesca usando nomes como "Mugía, Lage, Puentedeume", alleos a Galicia e "fóra de calquera uso legal desde hai 41 anos".
O presidente da Mesa lembra que o artigo 10 da Lei 3/1983 de Normalización Lingüística recolle que os "topónimos de Galicia terán como única forma oficial a galega", o que tamén se contempla en acordos internacionais como a Carta europea das linguas rexionais e minorizadas ou o convenio marco para a protección das minorías nacionais, pormovidos polo Consello de Europa.
"O acordo da sociedade galega respecto da denominación dos nomes dos lugares é unánime", afirmou Maceira, quen agregou que "só é cuestionado desde os postulados ideolóxicos que desde o supremacismo lingüístico e cultural pretende, desde fóra, sementar a división e o enfrontamento do noso país atacando calquera expresión de identificación da sociedade galega", sentenciou.
