BNG acusa á Xunta de "boicotear" a declaración de zonas tensionadas para que "non se limite" o prezo do aluguer
Esixe elaborar unha declaración destas zonas co obxectivo de regular os prezos e "garantir o dereito" a unha vivenda digna.
Por E.P. | SANTIAGO DE COMPOSTELA | 30/03/2024 | Actualizada ás 15:55
O BNG acusou ao PPdeG, desde ao Xunta, de facer un "auténtico boicot" á declaración de zonas tensionadas para "que non se limiten" os prezos dos alugueres.
A deputada da formación nacionalista Alexandra Fernández remarcou o "brutal incremento de prezos" en Galicia, "especialmente" en ámbitos urbanos e zonas con presión turística, e criticou que a Administración galega en "lugar de tentar pór freo á situación traballa para que non se apliquen os topes dos prezos".
En palabras de Fernández, "todas as actuacións" da Xunta "van encamiñadas" a "pór trabas" á limitación de prezos e "para mostra" a reforma da lei da vivenda, feita "pola porta de atrás", utilizando lei de acompañamento dos orzamentos de 2024.
"A Xunta tentou eximirse das súas responsabilidades como Administración competente en vivenda desviando a súa responsabilidade na tramitación de áreas tensionadas aos concellos, e atar ás administracións locais de pés e mans, cunha serie de esixencias para que ningún concello consiga sacar adiante a declaración de zona tensionada", explicou a do BNG.
Entre esas "esixencias", detallou, atópanse, por exemplo, a "obrigatoriedade" de realizar unha mesa coa patronal inmobiliaria e "contar coa súa visto e prace", así como que "a pesar de cumprir" cos criterios establecidas coa lei, a Xunta se "reserva a capacidade" de tomar a decisión final ou "deixar caer" a proposta, en base a "criterios tan abstractos" como "posibles efectos negativos" en base ás "actas da mesa patronal".
Alexandra Fernández lembrou que, "ante a esixencia" de contar co "visto e prace da patronal", os obxectivos da limitación de prezos é "garantir" o dereito social de acceso a unha vivenda digna ante un "aumento brutal" dos prezos. A modificación introducida "pasa por encima" dese dereito pero o PPdeG, denunciou Fernández, "só busca blindar beneficios empresariais por encima do dereito á vivenda".
Para iso, establecen que "aínda que se cumpran" os criterios para declarar unha área como tensionada, a patronal e a Xunta, "en complicidade, poidan paralizar a declaración para manter beneficios".
PRIMEIRA DECLARACIÓN DE ÁREAS TENSIONADAS
Desta forma, o BNG esixiu "un cambio de actitude" da Xunta e que abandone o "permanente boicot" ás "propostas útiles para Galicia".
Fernández asegurou que o Executivo galego "debe usar as competencias propias" para "adecuar a aplicación" das áreas tensionadas á realidade urbana da comunidade. Por iso, a formación nacionalista solicitou a elaboración da "primeira declaración de áreas tensionadas de Galicia, cunha perspectiva global como xa fixo Cataluña".
