Confirmados 10 anos para un ourensán que drogou e violou a unha nena de 13 anos
A menor era filla da súa exparella.
Por Europa Press / Redacción | OURENSE | 05/04/2024 | Actualizada ás 12:39
A Sala do Civil e Penal do Tribunal Superior de Xustiza de Galicia (TSXG) confirmou a condena de 10 anos de cárcere imposto pola Audiencia Provincial de Ourense a un acusado de agredir sexualmente á filla menor da súa exparella.
No fallo, o TSXG estimou parcialmente o recurso de apelación interposto pola representación procesual do procesado, rebaixando de 10 a cinco anos a medida de liberdade vixiada, pero mantendo os 10 anos de prisión. Os feitos ocorreron na madrugada do 2 de marzo de 2022, cando o acusado recolleu á menor, que naquel momento tiña 13 anos, na localidade de Viana do Bolo, onde se atopaba celebrando o entroido.
A finalidade era levala ao seu domicilio, algo que acordara coa súa nai. Con todo, o procesado propúxolle ir tomar a última copa a un bar que rexentaba e que xa se atopaba pechado ao público. Unha vez no establecemento, o acusado preparou dúas copas, a menor deulle un grolo á súa e, ao pouco intre, quedou durmida encima da mesa. Cando se espertou, o agora condenado díxolle que sentase con el, e, "valéndose do estado de seminconsciencia no que se atopaba e con ánimo libidinoso", agrediuna sexualmente.
Os maxistrados da Audiencia relataban na sentenza que o procesado convivira coa nai da menor, coa que tivo dous fillos, entre os anos 2014 e 2021, "polo que existía un forte vínculo afectivo e de confianza, a pesar de que a relación rompeu no ano 2021 de maneira definitiva".
Así mesmo, subliñaban no fallo que o relato da vítima era "claro, reiterado e digno de crédito", á vez que asegura que, en todo momento, "relatou de forma practicamente monocorde o reiterado ataque sexual que sufriu, relato verosímil e crible e que aparece corroborado polas probas documental, pericial e testifical practicadas, en unión do expreso recoñecemento de autoría do imputado". A pesar de todo, a resolución non é firme, pois contra ela cabe presentar recurso de casación ante a Sala Segunda do Tribunal Supremo.
