Gala do Premio Joven Empresario de Galicia, o próximo xoves 18 de abril en Poio

A Asociación de Novos Empresarios (AJE) Galicia presentou a décimo terceira edición dos Premios Joven Empresario e Iniciativa Emprendedora de Galicia que se celebrará nunha gala que terá lugar o xoves 18 de abril, ás 19.30 horas, no Pazo de Colón, situado no municipio pontevedrés de Poio.

O presidente de AJE Galicia, Luciano Covelo, acompañado da presidenta de AJE Pontevedra, María Buceta, do vicepresidente da Deputación de Pontevedra, Rafa Domínguez; e do alcalde de Poio, Ángel Moldes, informou este luns deste evento nunha rolda de prensa convocada na área arqueolóxica da Caeira. O presidente de AJE Galicia explicou que a elección do Concello de Poio para celebrar a gala busca "fomentar a vertebración de Galicia como país", promovendo o rural e "fomentando que haxa máis emprego e máis emprendemento". Covelo apuntou que para a gala deste ano xa hai máis de duascentas persoas inscritas.

Pola súa banda, Rafa Domínguez destacou na súa intervención o "papel fundamental" que AJE realiza como "vínculo de unión e colaboración" e reafirmou que a Deputación de Pontevedra está disposta a seguir apoiando ao sector emprendedor "para contribuír ao dinamismo económico e ao avance da provincia". Finalmente, o alcalde, Ángel Moldes, agradeceu a AJE que escollesen o Concello que goberna "para pór en valor o municipio", subliñando a importancia que os premios teñen en toda Galicia debido ao traballo que AJE realiza sendo "referente do emprendemento e da mocidade".

AJE Galicia presenta a gala do Premio Xove Empresario que se celebrará no Pazo de Colón | Fonte: CONCELLO DE POIO