O PP e o PSOE de Pontevedra pídenlle medidas a Lores para acabar coa inseguridade
Por E.P. | SANTIAGO DE COMPOSTELA | 22/04/2024 | Actualizada ás 13:11
Os grupos municipais do PP e do PSOE aprobaron por maioría unha moción no Pleno do Concello de Pontevedra pola que esixen ao Goberno local do BNG que tome medidas efectivas para solucionar os problemas de inseguridade cidadá xerados en varias zonas emblemáticas da cidade como a praza da Ferrería, cale Oliva ou o barrio de Campolongo
A moción defendida polo portavoz municipal do PP local, Rafa Domínguez, insta o alcalde da capital, Miguel Anxo Fernández Lores, a "asumir a súa responsabilidade" porque, na súa opinión, desde a celebración da Xunta Local de Seguridade o Concello, "non fixo absolutamente nada" para resolver unha problemática que está a provocar un "efecto chamada" de persoas con drogodependencia.
A concelleira de Seguridade Cidadá, a nacionalista Eva Villaverde, explicou que o que ocorre en Pontevedra son "problemas de convivencia comúns a todas as cidades" e admitiu que lles "preocupa", polo que traballan "con discreción" matizando que non fala de "de resolver imposibles, senón utilizar instrumentos que temos á nosa disposición para mellorar esta convivencia".
Pola súa banda, o portavoz do grupo municipal do PSOE, Iván Puentes, destacou que en Pontevedra hai "o goberno municipal que menos diñeiro destina a política social" e ademais "faltan efectivos da Policía Local". A moción foi finalmente aprobada pola maioría que forman os concelleiros do Partido Popular e do Partido Socialista, mentres que os edís do BNG votaron en contra.
REPRESENTANTES DE SINDICATOS POLICIAIS
Seguindo o pleno no patio de butacas do Teatro Principal había representantes da Confederación Española de Policía (CEP) e do Sindicato Unificado de Policías (SUP), que expresaron o seu rexeitamento ao "sinsentido" da instalación de bolardos na rúa Peregrina.
Esta protesta foi recollida polos portavoces do PP e do PSOE que se referiron a este asunto durante o debate desta moción sobre a seguridade cidadá reprochando ao Goberno local a falta de consenso nestas medidas e que non se adopten unicamente desde o punto de vista do urbanismo.
