O BNG esixe ao Goberno que se garanta o voto dos mariñeiros embarcados en alto mar

O deputado do BNG no Congreso, Néstor Rego, denunciou o "atraso" do Goberno para establecer o mecanismo que permitiría que os tripulantes embarcados en alto mar poidan votar nas próximas eleccións europeas.

Segundo explican nun comunicado, demandan implantar o voto telemático ou electrónico, tal e como quedou incorporado na Lei de Pesca Sustentábel "grazas a unha emenda do BNG, para garantir que os mariñeiros poidan exercer o seu dereito a voto".

Lembran que durante o debate e votación da Lei de Pesca Sustentábel e Investigación Pesqueira aprobada na pasada lexislatura, o BNG "conseguiu incorporar unha emenda que permitiría garantir o dereito a voto dos tripulantes embarcados en altura e gran altura". Apuntan que o que buscaban era "acabar cunha discriminación histórica que sufría o sector".

A lei publicouse no Boletín Oficial do Estado (BOE) o pasado marzo, pero coa disolución das Cortes do Estado, a celebración das eleccións xerais de xullo e a conformación do novo Goberno, entenderon que para os primeiros comicios posteriores, o mecanismo aínda non se estableceu.

O deputado pola circunscrición da Coruña, Néstor Rego, no Pleno do Congreso dos Deputados. Alberto Ortega - Europa Press - Arquivo | Fonte: Europa Press