Galicia reforza a súa presenza no mercado turístico de excelencia en Milán

Turismo de Galicia está a participar estes días en Milán nunhas xornadas con máis de 20 operadores especializados no mercado de excelencia.

Con esta actuación, a Xunta avanza no posicionamento do destino Galicia entre segmentos de mercado de alto impacto turístico, pondo en valor os numerosos activos cos que conta a Comunidade galega con experiencias e servizos de excelencia.

Así, entre as accións promocionais inclúense os reclamos culturais e de lecer, o patrimonio cultural e gastronómico, a enogastronomía, os xardíns históricos ou opcións de alto nivel en compras. En concreto, promociónanse produtos como a ruta dos viños e camelias, a Ribeira Sacra ou a costa e interior galegos.

Esta iniciativa enmárcase na aposta de Turismo de Galicia por seguir reforzando a presenza do turista internacional, que está a crecer na Comunidade nos últimos anos e que é un dos obxectivos estratéxicos máis inmediatos. Ademais, leva anos traballando para atraer un tipo de viaxeiro de alto poder adquisitivo que estatisticamente realiza un importante número de viaxes ao ano, polo que contribúe a romper a estacionalidade turística, e que conta cunha alta capacidade de gasto no destino.

Canón do Río Sil durante o traxecto do catamarán do Sil pola Ribeira Sacra | Fonte: Carlos Castro - Arquivo