Unha sentenza recoñece que as eléctricas cobran de máis

Unha sentenza do Xulgado de Vilalba recoñece o que xa é un segredo a voces; que as facturas das eléctricas están inchadas e recollen sobrecustos non especificados nos contratos orixinais cos clientes. Sobrecustos que se reparten entre a comercializadora e a distribuidora e que poden chegar a supor entre un 15 e un 30% máis.

Neste caso, e segundo esta sentenza á que tivo acceso GC, o xulgado de instrución n.1 de Vilalba rexeita unha demanda que, curiosamente, interpuxo Iberdrola contra un dos seus usuarios por non pagarlle unha serie de facturas que sumaban 6.748,81 euros.  A xuíza acaba apuntando na súa sentenza que as irregularidades son cometidas pola compañía eléctrica e pola distribuidora Begasa por cobrar por conceptos que non foran contratados polo cliente.

“No alcanza esta juzgadora a entender qué más tenía que haber hecho el cliente para no caer en la desprotección que tales irregularidades le han generado”, sinala. E, remata, “tales facturas elaboradas con semejante quiebra de los derechos del consumidor no pueden en modo alguno probar que se adeuda la cantidad que se reclama”.

Pero, cales son estas irregularidades?. A sentenza entende que o consumo que recollen os contadores eléctricos non se corrresponden coa tarifa contratada polo usuario. De feito, e tras varias inspeccións realizadas, detectáronse “anomalías” no contador.  Ademais, as lecturas realizadas por Begasa, a distribuidora, e pola eléctrica, Iberdrola, non se corresponden, tendo facturado de máis a segunda segundo os cálculos dos peritos. Ademais, as facturas non conteñen nin os datos das lecturas do contador, polo que o usuario entende que “poden ser inventadas”. 

De feito, o cliente, explicoulle á xuíza que o que contratou foi un cambio de discriminación horario, pero nunca un cambio de potencia. A pesar diso, o seu contador rexistrou un incremento da potencia de dous KW, pasando de 11KW a 13KW.

Iberdrola alegou que as tarifas de acceso a redes son reguladas e que as peaxes son fixadas por orden ministerial e están suxeitas a diferencias cun límite superior de tarifa dun 3%. Sen embargo, a xuíza entende que Iberdrola superou dito límite cun exceso de case un 9% por un erro do contador. Un exceso que lle cobraron ao usuario tanto a eléctrica como a distribuidora; en total, case un 18% máis de incremento ilegal na factura.