Arde un camión na A-52 á altura de Ourense

Os servizos de emerxencias traballan nestes momentos para atallar o incendio dun camión na A-52 á altura de Ourense, para o que se tivo que interromper a circulación no carril afectado, así como o acceso á OU-11. Múltiples particulares chamaron ao 112 Galicia para informar o suceso: un camión de caixa estaba a arder no quilómetro 228 da A-52 en sentido Vigo, á altura do desvío para a OU-11.

No lugar había un home tentando apagar as chamas cun extintor, mentres que dous quilómetros antes, no 226, ardía a vexetación da beiravía. Os alertadores sinalaron que foi a consecuencia do lume no camión, que comezara na zona das rodas. A escura fumareda era visible desde diversos puntos do municipio e, como o incendio produciuse á altura do carril de saída da autovía, interrompía a circulación por completo.

Desde o Centro Integrado de Atención ás Emerxencias solicitouse a acción dos Bombeiros de Ourense, da Garda Civil de Tráfico e dos servizos de mantemento da vía. Nestes momentos continúan os traballos para atallar as chamas e abrirase proximamente a circulación, despois de que o servizo de mantemento e conservación colocase a sinalización circunstancial necesaria.

Como o vehículo transportaba un bloque granítico de grandes dimensións, estase á espera dun guindastre de gran tonelaxe, que descargue a pedra e a coloque sobre outra góndola. Cando se inicien estes labores, volverase a cortar este ramal.

Camión de bombeiros