Catro anos e medio de cárcere por agredir a unha parella na terraza dun bar en Muxía

A sección segunda da Audiencia Provincial da Coruña condenou a 4 anos e medio de prisión a un home que agrediu a unha parella na terraza dun bar de Muxía, e ao que lle aplicou a circunstancia agravante de reincidencia, por ser condenado anteriormente por feitos similares. O tribunal provincial considera probado que, na noite do 27 de xuño de 2020, o acusado achegouse a unha terraza onde había un grupo de persoas. Nun primeiro momento, discutiu cun dos homes que estaban alí, pero logo marchou.

Cando regresou ao mesmo sitio, a persoa coa que discutira xa non estaba, pero el seguiu roldando a mesa onde seguía o resto do grupo, ata que unha das mulleres pediulle explicacións. Tamén se levantou para dirixirse ao acusado a parella dela e, cando se estaba achegando, o procesado levantou de forma sorpresiva unha barra alongada e golpeoulle dúas veces na cabeza.

A vítima quedou aparvada e o acusado seguiu golpeándoo ata que caeu ao chan. A súa parella abalanzouse sobre o acusado para tratar de frear o ataque, e acabou tamén no chan, mentres os golpes continuaban, a pesar de que ela gritou que estaba embarazada. A Audiencia sinala na súa resolución que hai poucas dúbidas sobre os feitos ocorridos, xa que gran parte da agresión puido verse nun vídeo, no que se aprecia a actitude do acusado, armado, e cun "comportamento manifestamente violento".

O tribunal non deu crédito aos argumentos do acusado, que no xuízo alegou que actuara en defensa propia porque o home ao que golpeou ameazáralle previamente cun botello roto (feito que a Audiencia non considera probado). Igualmente, tampouco viu acreditada unha intoxicación ou toxicomanía que puidese afectar ao procesado no momento da agresión. Por outra banda, a sala si aprecia a agravante de reincidencia, xa que o acusado foi condenado en dúas ocasións no ano 2017, por un delito de lesións graves por imprudencia e outro de lesións agravadas, e tamén en 2019 por un delito de lesións agravadas.

Así, a Audiencia resolveu condenalo a 4 anos e medio de prisión por un delito de lesións con instrumento perigoso e a indemnizar ao home agredido nuns 5.000 euros. Igualmente, condenouno ao pago dunha multa de 450 euros polas lesións leves ocasionadas á parella do home, á que deberá indemnizar en 250 euros. A sentenza non é firme e pode ser recorrida en apelación.

Audiencia Provincial de Xustiza, os seus xulgados na Coruña | Fonte: Arquivo