A Festa do Marisco de Fene chega o 17 e 18 de agosto cos mariscadores preocupados pola campaña de verán
"A día de hoxe o noso principal recurso é a navalla, que a temos pechada por toxina, e esperemos que para a semana podamos saír a traballar", explicou o patrón maior da confraría Santiago Apóstolo de Barallobre, Jorge López, antes de engadir que hai mariscadores á boia e a pé, "que están mal sobrevivindo".
Por Europa Press / Redacción | FERROL | 28/06/2024 | Actualizada ás 17:43
O patrón maior da confraría Santiago Apóstolo de Barallobre de Fene, Jorge López, adiantou que o acto de peche do centenario deste depósito será a celebración da Festa do marisco, os días 17 e 18 de agosto na súa sede. Así o explicou ante os medios no salón de plenos do Concello, onde López catalogou de positivos os diferentes actos organizados nos últimos meses para celebrar esta efeméride. "Nós o que tratabamos era de potenciar e pór en valor os produtos que temos aquí, extraídos polos nosos socios", sinalou.
Respecto diso, explicou que o obxectivo é "mostrar tanto a particulares como a restauración e a empresas de distribución, os produtos" para darlles "un maior valor". Deste xeito, sabendo que dispoñen de "os mellores produtos", os socios poden pedir que lles paguen "realmente polo que valen". A pesar diso, este profesional do mar admitiu que o colectivo está "en horas baixas" e ten "moi pouco produto", aínda que matizou que "é dunha calidade moi alta". "Agora estamos a ver que, despois de facer varios eventos en feiras, centros comerciais ou congresos, todo o mundo está a reclamar o noso produto", remarcou.
VENDA DIRECTA
Jorge López lembrou que nas súas instalacións ao pé da ría de Ferrol, a confraría conta cunha depuradora propia e que, desde estas instalacións, véndense directamente os produtos que recollen os socios a calquera persoa particular, comercio, restauración, ou empresa. Ademais, o depósito dispón de venda 'en liña' e traballa con compradores de Madrid, Valladolid, Burgos ou Cataluña, ademais de Andalucía e parte do norte de España.
En canto á campaña de verán detallou que non a encaran "con moito entusiasmo", xa que ao seu entender "a xente está en horas moi baixas" e cada vez hai "menos produto". Segundo explicou, non se está atopando unha solución "para que a ría volva producir" e reclamou "máis investimento nun estudo integral" para saber "cal é o problema da ría", e desta forma "poder resolvelo dunha vez".
"A día de hoxe o noso principal recurso é a navalla, que a temos pechada por toxina, e esperemos que para a semana podamos saír a traballar", explicou, antes de engadir que hai mariscadores á boia e a pé, "que están mal sobrevivindo". López detallou que a día de hoxe teñen "estamos a ter unha media entre 10 ou15 persoas, cando fai 10 ou 12 anos case tiñamos 100 embarcacións traballando o marisqueo este mesmo mes".
FESTA
En canto á programación da Festa do Marisco do mes de agosto, detallou que a previsión para o 17 de agosto é contar con concertos de grupos locais, ademais dun 'show cooking' para degustar gratuitamente vise e marolo, a cargo do cociñeiro Marcos Cabanas, do Restaurante A Oliveira de San Mateo en Narón. Igualmente, celebrarase unha comida popular con produtos da ría, e pecharase a conmemoración do centenario cunha homenaxe aos socios da confraría, e unha cea popular tamén con produto da ría. Para o segundo día, 18 de agosto, haberá outro 'show cooking' con degustación de navallas e ameixas, neste caso tamén a cargo doutro cociñeiro local, Esmeil González, do restaurante do Peirao 43 de Mugardos, ademais de actividades para os nenos durante os dous días.
