“Pique” entre os alcaldes da área de Porto polo voo entre Vigo e Lisboa
Denuncian que detrás da medida hai a intención de “levar o mercado galego a Lisboa”. Os alcaldes da Eurorrexión discuten sobre as obras do AVE A Coruña-Lisboa e tamén de proxectos conxuntos.
Por Galicia Confidencial | Porto | 03/02/2016 | Actualizada ás 12:35
Varios alcaldes da área do Porto amosaron o seu malestar polo voo que recentemente se anunciou pola compañía portuguesa TAP entre Vigo e Lisboa. Un voo, din, que prexudica a cidade do norte luso.
Por iso, aproveitaron a reunión da Comisión Executiva do Eixo Atlántico, que se reuniu en Santa María da Feira, en Portugal, para criticar esta medida cando xa existe outro voo desde A Coruña e, sen embargo, “non se impulsa o tren desde a capital herculina á portuguesa”.
Ademais, consideran que esa conexión aérea é unha "manobra contra Porto” que coincide, ademais, coa eliminación de varias liñas da TAP desde esta cidade a Bruxelas, entre outras. Neste sentido, denuncian que se queira “levar o mercado galego a Lisboa" en detrimento de Porto.
Por outra banda, nese encontro falouse do tren de altas prestacións A Coruña-Lisboa, cuxa "batalla ten que terminar de darse en Portugal", segundo explicou o secretario xeral deste ente, Xoán Vázquez Mao. Na reunión tamén se debullaron as contas do Eixo e o seu programa para 2016, pero tamén importantes cuestións relativas a infraestruturas.
Unha delas será a conexión do tren A Coruña-Lisboa, non xa Porto-Vigo, unha liña esta última que require de certa modernización coa implementación do saída sur de Vigo. "Para que haxa unha liña A Coruña-Lisboa, que xa o estamos falando con Portugal, ten que facerse a saída sur de Vigo", sostén o secretario xeral do Eixo, para o que calcula un investimento de 400 millóns de euros.
O máximo órgano de dirección da entidade que engloba a concellos de Galicia e do Norte de Portugal falou tamén das colaboracións entre os concellos para temas de promoción conxunta e acordou, en materia de desenvolvemento sustentable, realizar os traballos solicitados polos municipios que presentaron candidatura na convocatoria anual, aberta a finais de 2015.
Entre eles atópanse dous proxectos do Concello da Coruña que teñen que ver co compromiso ambiental e a sustentabilidade, así como outros presentados polos concellos de Compostela, Monforte, Ourense, Vilagarcía, Chaves ou Vila Real, Maia en Macedo de Cavaleiros, así como pola Deputación de Lugo.
