Os talentos galegos tamén chegan a Google
Cinco enxeñeiros galegos están entre os 64 grupos elixidos en todo o mundo por unha iniciativa do xigante tecnolóxico.
Por Galicia Confidencial | Vigo | 12/03/2016 | Actualizada ás 13:00
Un grupo de científicos galegos pode chegar ao máis alto da iniciativa promovida por Google, o Instituto de Enxeñeiros Eléctricos e Electrónicos (IEEE) e o Laboratorio Nacional de Enerxías Renovables de Estados Unidos (NREL) para impulsar un salto tecnolóxico na conversión de corrente continua.
E é que cinco enxeñeiros galegos conseguiron situarse, co seu proxecto "SpiritOfSaintMartinho", entre os 64 grupos que conseguiron igualar ou superar as especificacións do desafío mundial "The Little Box Challenge". En xogo está un premio dun millón de dólares para o equipo que deseñe o dispositivo investidor máis compacto.
Estes dispositivos transforman corrente continua fornecida por paneis solares ou baterías en corrente alterna para o seu uso en fogares e empresas. O equipo galego explica nun comunicado que "o problema" que presentan os investidores domésticos é o seu excesivo tamaño e prezo, polo que unha redución dos mesmos permitiría máis fogares solares, redes de distribución máis eficientes e axudaría a dispor de electricidade nos recunchos máis remotos do planeta.
Este equipo ofrece 2 quilowatts de potencia nun deseño compacto e eficiente, ocupando un volume inferior a medio litro, o que supón unha redución "nun cociente de 10 a 1 con respecto ao tamaño" dos equipos que se atopan actualmente no mercado.
