Arrinca a elaboración das normas que sentarán as bases da ordenación do litoral galego

A Xunta abriu o período de consulta pública previa do anteproxecto de decreto polo que se crean as Directrices de ordenación do litoral (DOL), co obxectivo de reunir achegas e suxestións en relación á elaboración e contido do que asegura que será o "instrumento crave para garantir a xestión integral da costa en Galicia". Así o destacou o presidente da Xunta, Alfonso Rueda, que sinalou que o trámite se iniciará nos próximos días. Ademais, apuntou que "durante dous meses" estará aberto a todas as persoas, entidades e administracións interesadas en participar.

A Xunta destaca que a xestión integral do litoral require preservar a costa en beneficio das xeracións presentes e futuras e, para alcanzar este obxectivo, asegura é necesario garantir que as actividades que se van a realizar na costa permitan un desenvolvemento integral desde o punto de vista ambiental, social e económico. Nesta liña, as DOL establecerán criterios xerais coherentes e precisos (que serán regulados por diversos plans de ordenación) para dotar á comunidade dunha regulación coordinada e garantir a seguridade xurídica na ordenación e xestión do litoral.

Máis ao detalle, segundo explicou o presidente, estas directrices "fixarán os criterios das actividades estratéxicas que se poden realizar" nas zonas nas que se divide o litoral galego, así como as que non son autorizables, co propósito de garantir o equilibrio entre a protección dos recursos naturais e dos ecosistemas co desenvolvemento económico e social. En concreto, apuntou Rueda, conterán os criterios tanto para "identificar os espazos de interese ambiental e paisaxístico que necesiten dunha maior protección, conservación e ordenación", como para determinar as condicións para implantar as distintas actividades económicas e sociais de axentes públicos e privados que operen no litoral, como, por exemplo, "o sector hostaleiro ou a cadea mar-industria".

Ademais, o titular do Goberno galego sinalou que "fixarán as pautas para crear unha rede de sendas do litoral" na que se garantirá unha intervención respectuosa coa paisaxe e cos hábitats. Deste xeito, aplicarase unha visión de conxunto para optimizar a súa execución e mantemento, facilitar o seu uso e aproveitar as sinerxías con outros elementos de valor natural e cultural presentes no mesmo ámbito territorial. Así, definirán as condicións que deben reunir as vías que conformarán esa rede, indicarán os requisitos para o acondicionamento de novos tramos e detallarán os criterios de deseño, sinalización e divulgación da rede. Tamén determinarán os criterios para garantir o acceso ao mar e o estacionamento, sinalou Rueda, que indicou que incluirán cuestións como os aparcadoiros ao servizo das praias ou as áreas para estacionamento de caravanas.

Ademais, abordarán cuestións relativas a determinar a concentración urbana admisible na costa, orientar accións de renovación ou rehabilitación urbana e ampliación dos espazos públicos, identificar as accións necesarias para o seu aproveitamento racional e sustentable, así como os criterios para establecer os usos estratéxicos e prioritarios do mar para os efectos de elaborar o Plan de ordenación mariña. A Xunta destacou que este novo instrumento será o marco xeral de referencia para o desenvolvemento das restantes ferramentas de ordenación previstas na Lei de ordenación e xestión integrada do litoral de Galicia (Loxilga), así como para a formulación e a execución das distintas políticas sectoriais sobre a costa.

Imaxe do mar na costa de Caión, no municipio coruñés da Laracha | Fonte: Arquivo