Expulsado de xeito definitivo ao edil do PSOE que deu a Alcaldía ao PP en Outes
Por Europa Press / Redacción | SANTIAGO DE COMPOSTELA | 02/04/2025 | Actualizada ás 10:15
A Comisión Executiva Federal do PSOE expulsou de maneira definitiva ao seu concelleiro en Outes, José Antonio Caamaño, despois de que o pasado mes de febreiro votase a favor da moción de censura que permitiu que Francisco Calo, do PP, obtivese a Alcaldía do municipio.
Nun comunicado, a dirección provincial do PSdeG-PSOE confirma que Ferraz acaba de resolver a expulsión que anteriormente decidira de maneira provisional, a través dunha resolución asinada polo secretario de Organización do partido, Santos Cerdán.
O instrutor do expediente rexeita as alegacións de Caamaño por consideralas "innecesarias e impertinentes, encamiñadas unicamente a dilatar a instrución do expediente, sen que a súa práctica poida resultar determinante respecto ao feito da subscrición (e posterior apoio) da moción de censura sen que exista autorización expresa dos órganos competentes do Partido".
Ademais, o documento enumera as veces que o agora concelleiro expulsado foi notificado da apertura do expediente, tanto por burofax como por correo electrónico, para advertir que "non pode prosperar" a súa alegación de indefensión, porque, ademais, os feitos "eran públicos e notorios".
En calquera caso, contra esta decisión, o edil aínda pode interpor un recurso ante a Comisión Federal de Ética e Garantías do PSOE. Ante esta resolución de Ferraz, o secretario xeral do PSdeG-PSOE da provincia da Coruña, Bernardo Fernández Piñeiro, lembra que o concelleiro de Outes adoptou a decisión de apoiar a moción de censura do PP "sen ningún tipo de consulta" ao partido nin de aprobación por parte de instancias superiores nin da agripación socialista local.
