O PSdeG crea grupos de traballo sobre lingua, sanidade, clima e economía, "emerxencias" de Galicia
Por Europa Press / Redacción | SANTIAGO DE COMPOSTELA | 07/04/2025 | Actualizada ás 22:16
O PSdeG iniciará un proceso de apertura a toda a militancia para que se some a uns grupos de traballo sobre varias "emerxencias" que, segundo observa o partido, vive Galicia a distintos niveis, como a lingüística, a sanitaria, a climática e a financeira no plano municipal. A idea matriz é que "onde hai un problema, aí estará e aí está xa o PSdeG".
Así o trasladou a secretaria de Organización, Lara Méndez, nunha rolda de prensa tras a celebración da Executiva Nacional do partido este luns en Santiago. Pese ao "bo clima" da reunión, arrincou cun minuto de silencio polo crime machista do Bolo. Estes grupos de traballo en diferentes áreas aspiran a sumar as achegas de militantes que coñezan cada materia, ben por profesión ou porque son concelleiros responsables dunha área concreta no seu concello. O "punto de partida" serán os textos que saíron aprobados no Congreso Nacional celebrado o pasado marzo, no que José Ramón Gómez Besteiro revalidou a Secretaría Xeral.
A secretaria de Organización, tras mencionar o crime do Bolo, sinalou como primeira "emerxencia" a de "igualdade de xénero", que ten como "a súa máxima expresión en asasinatos de mulleres". "O PP é cómplice do negacionismo de Vox, cando non o asume en primeira persoa", sinalou.
No plano sanitario, Méndez sinalou como "hai un ano" o PSdeG comprometíase a percorrer "todos os centros de saúde onde hai problemas". Así, lembrou a participación dos socialistas en manifestacións convocadas por plataformas en defensa da sanidade, a última o domingo en Santiago de Compostela: "Á beira dos veciños".
