O exterior de Sálvora e sur de Rías Baixas como puntos de vertedura de áridos para o dragado do Lérez

A Xunta de Galicia recibiu o informe técnico definitivo do Centro de Estudos e Experimentación de Obras Públicas (CEDEX), organismo técnico dependente do Goberno central, no que ratifica a zona E8, no exterior de Sálvora, como "alternativa prioritaria" para depósito de áridos.

Con todo, introduce unha novidade só no caso dos dragados da ría de Pontevedra: se no avance do informe se recomendaba para estes casos o depósito no punto E8, no informe definitivo recóllese que poderá "verterse indistintamente na zona D (sur da Rías Baixas) ou na E8". Engade que "sería adecuado propor un enfoque individual en cada proxecto".

Nun comunicado, a Consellería do Mar informa de que agora Portos de Galicia remitirá "de inmediato" o informe ao Ministerio de Transición Ecolóxica para que autorice o punto de depósito para as obras de dragado do Lérez, en exercicio da súa competencia.

A zona nas proximidades da illa de Sálvora empregábase para a vertedura de áridos de actuacións como esta ata que en abril de 2021 o Ministerio rexeitou a autorización de novos depósitos á espera dun estudo de alternativas, cunha paralización da tramitación de todos os dragados do sur de Galicia.

Así mesmo, o informe definitivo mantén as recomendacións de vertedura que se recollían no avance. Así mesmo, sinala o punto D (ao sur das Rías Baixas) como o máis apropiado para os dragados que se executen na ría de Vigo e o punto E8 para as da ría de Arousa.

Este informe técnico non supón aínda a autorización para iniciar o depósito de áridos neste punto, xa que esta competencia corresponde ao Miteco que autorizará se procede un ou outro punto. Finalmente, o Goberno galego apunta a que hai 16 depósitos de áridos paralizados ao sur da ría de Muros.

Río Lérez ao seu paso por Pontevedra | Fonte: CONCELLO DE PONTEVEDRA - Arquivo