Por unha infancia lectora en Galicia

Victor Manuel Serén Cañás, dende Carballo

A lectura non só mellora o vocabulario ou a ortografía; tamén abre a mente, esperta a imaxinación e ensínanos a poñernos na pel dos demais, desenvolvendo a capacidade da empatía. Por iso é preocupante que o hábito lector non estea tan arraigado como debería a idades temperás.

Non abonda con fomentar a lectura dende a escola. As institucións, os medios de comunicación e as familias teñen moito que aportar para que os libros sexan parte natural da infancia e da mocidade, sen que sexa visto como unha obriga.

Aproveitemos o Día Internacional do Libro para lembrar que, se queremos unha Galicia con máis persoas libres, creativas e críticas, hai que inculcar a afección pola lectura dende a infancia. Deste xeito crearemos un futuro un pouco mellor.