Anuladas máis de 700 débedas por ter un importe inferior a 3 euros
Por Europa Press / Redacción | SANTIAGO DE COMPOSTELA | 02/05/2025 | Actualizada ás 11:22
A Axencia Tributaria de Galicia anulou máis de 700 débedas a contribuíntes por ter un importe inferior a 3 euros, segundo anunciou a Consellería de Facenda e Administración Pública nun comunicado.
En concreto, o Diario Oficial de Galicia (DOG) publicou este venres unha resolución conxunta da Axencia Tributaria e da Intervención Xeral da Comunidade Autónoma pola que se acorda a anulación e baixa en contabilidade de todas aquelas liquidacións que se atopen en período executivo e das cales resulte unha débeda pendente de recadar por un importe de menos de 3 euros.
Esta anulación realízase de forma periódica por todas as administracións tributarias. O seu obxectivo é evitar actuacións recadatorias que supoñen unha perda para a facenda pública, xa que nestas liquidacións xéranse uns custos superiores aos recursos que potencialmente se puidesen obter coas mesmas. Neste caso trátase de 714 débedas que suman case 930 euros en total, cun importe medio que rolda os 1,30 euros.
